Elon Musk ka lançuar një platformë të re online, që synon të rivalizojë Wikipedia-n – por këtë herë, me ndihmën e inteligjencës artificiale.
Të hënën, më 27 tetor, 54-vjeçari prezantoi Grokipedia, një enciklopedi dixhitale e krijuar dhe menaxhuar plotësisht nga AI. Faqja është produkt i kompanisë së tij të inteligjencës artificiale xAI, e themeluar në vitin 2023, e cila gjithashtu qëndron pas asistentit “Grok” – fakt-kontrolluesi që përdoret në platformën e tij sociale X (ish-Twitter).
Sipas përshkrimit zyrtar, Grokipedia është “një enciklopedi online e fuqizuar nga AI, e dizajnuar si një alternativë më e vërtetë ndaj Wikipedia-s”.
Musk e ka kritikuar shpesh Wikipedia-n, duke e quajtur “tepër ‘woke’” dhe madje ka ironizuar se duhet të quhet “Wokipedia”.
“Po ndërtojmë Grokipedia në xAI. Do të jetë një përmirësim masiv krahasuar me Wikipedia,” shkroi Musk në platformën X më 30 shtator. “Kjo është një hap i nevojshëm drejt qëllimit të xAI – të kuptojmë universin.”
Aktualisht, Grokipedia përmban mbi 880 mijë artikuj, ndërsa Wikipedia ka mbi 7 milionë vetëm në anglisht. Ndryshe nga Wikipedia, artikujt e Grokipedia-s nuk shkruhen nga njerëz, por gjenerohen plotësisht nga inteligjenca artificiale, me burime të shumta dhe verifikim nga sistemi Grok. Megjithatë, përdoruesit mund të raportojnë pasaktësi nëse hasin informacion të gabuar.
Që në nisje, projekti është përballur me kritika. Mediat si NBC News dhe The New York Times raportuan se disa artikuj të Grokipedia-s janë kopje të drejtpërdrejta të përmbajtjes së Wikipedia-s, duke përfshirë edhe një shënim që pranon se “përmbajtja është përshtatur nga Wikipedia nën licencën Creative Commons.”
Musk reagoi në X duke thënë se “çështjet do të rregullohen deri në fund të vitit.”
Gjithashtu, faqja u rrëzua menjëherë pas lançimit, ndërsa Fox News raportoi se publikimi ishte shtyrë për një javë për shkak të problemeve teknike.
Në të njëjtën kohë, Wikimedia Foundation – organizata jofitimprurëse që menaxhon Wikipedia-n – publikoi një mesazh të fortë në faqen kryesore të saj:
“Pas gati 25 vitesh, Wikipedia mbetet interneti që na ishte premtuar – i ndërtuar nga njerëzit, jo nga makinat. Nuk është e përsosur, por nuk është këtu për të shtyrë një pikëpamje të caktuar. Është në pronësi të një organizate jofitimprurëse, jo të një miliarderi apo gjigandi teknologjik.”
