Lily Allen ka folur hapur për albumin e saj të ri, “West End Girl”, si dhe për mënyrën se si ish bashkëshorti i saj ,aktori David Harbour, mund të reagojë ndaj teksteve të këngëve.
Në një intervistë për Interview Magazine, e publikuar të martën, artistja 40-vjeçare tha se ky projekt nuk ka qëllim të jetë i ashpër apo ofendues.
“Nuk është një album mizor,” u shpreh Allen. “Nuk ndjej se jam e keqe në tekstet e mia — janë thjesht ndjenjat që po përjetoja në atë kohë.”
Albumi, i cili doli në treg më 24 tetor 2025, u shkrua dhe u regjistrua në vetëm 10 ditë, në dhjetor 2024 — periudha kur ajo dhe Harbour, u ndanë pas katër vitesh martesë.
“E shoh shumë ndryshe tani gjithë këtë situatë,” shtoi Allen. “Të gjithë kalojmë ndarje, dhe është gjithmonë e dhimbshme. Por rrallë ndodh që të kesh dëshirën të shkruash për të ndërsa po ndodh.”
Pavarësisht se shumë fansa e kritikë e kanë quajtur albumin e ri “album hakmarrjeje”, për shkak të teksteve që flasin për tradhti dhe dhimbje, Allen e mohoi këtë etiketim.
“Nuk kam nevojë për hakmarrje,” tha ajo. “Ky album është thjesht një pasqyrim i emocioneve që po përjetoja. Desha që të tingëllonte i dhimbshëm dhe tragjik, por në të njëjtën kohë fuqizues — pa u paraqitur si viktimë.”
Në 14 këngët e albumit, Allen përshkruan historinë e jetës së saj me Harbour — që nis me martesën e tyre në 2020 dhe zhvendosjen në Nju Jork, e deri tek ndarja e dhimbshme pas katër vitesh.
Në disa tekste ajo përmend një grua të quajtur “Madeline”, e cila, sipas mediave britanike, simbolizon një lidhje jashtëmartesore të aktorit. Megjithatë, këngëtarja ka sqaruar se “Madeline” është një personazh imagjinar, “një përfaqësim i të tjerëve”.
Në pjesët e mëvonshme të albumit, Allen i referohet një “burri me dy jetë” dhe pranon se marrëdhënia e tyre ishte “e hapur”.
Nga ana e tij, David Harbour është treguar i rezervuar për ndarjen. Në një intervistë për GQ Hype në prill, aktori i Black Widow tha se preferon të mos merret me thashetheme.
“Jam mbrojtës ndaj njerëzve dhe realitetit të jetës sime,” tha ai. “Nuk ka kuptim të përfshihesh në këtë formë histerie mediatike.”
