Ish bashkëshorti i këngëtares së njohur Sia, Dan Bernad, ka humbur betejën ligjore për kujdestarinë e plotë të djalit të tyre, Somersault “Summi”, pas një përplasjeje të ashpër në gjykatë.
Një gjykatës i Qarkut të Los Anxhelosit refuzoi kërkesën e Bernad-it të mërkurën, duke urdhëruar çiftin që të vazhdojnë me marrëveshjen ekzistuese të kujdestarisë, të nënshkruar më 1 gusht 2025.
“Gjykata konstaton se nuk është paraqitur ndonjë urgjencë e mjaftueshme për ndërhyrje emergjente,” thuhej në dokumentet gjyqësore të siguruara nga Page Six.
Kjo marrëveshje e mëparshme përcakton se Sia do të mbetet prindi kryesor kujdestar i vogëlushit 1-vjeçar.
Në kërkesën e tij, Bernad – i cili është mjek onkolog – pretendoi se është “i vetmi prind i sigurt dhe i besueshëm” për fëmijën e tyre, duke akuzuar Sia se është një “rrezik serioz dhe i menjëhershëm” për djalin.
“Sia është një prind i papërshtatshëm, që përballet me abuzim me substanca dhe varësi, gjë që e bën të paaftë të kujdeset në mënyrë të qëndrueshme për Summi-n,” thuhet në dokumentet e paraqitura në gjykatë.
Bernad kërkoi gjithashtu që Sia t’i nënshtrohej testeve të rregullta të drogës dhe që takimet e saj me djalin të ishin të monitoruara profesionalisht, vetëm tre herë në javë për dy orë.
Autorja e hiteve si “Chandelier” reagoi ashpër, duke i quajtur akuzat e tij “një përpjekje për ta kthyer në armë periudhën time të varësisë”.
Sia deklaroi se është e pastër prej gjashtë muajsh dhe ka qenë gjithmonë e gatshme për testime të rregullta, ndërsa akuzoi Bernad-in se ai vetë nuk i është nënshtruar testimeve të kërkuara.
Ajo shtoi se arsyeja pse Bernad ka të drejtë vetëm për takime të kufizuara me djalin është sepse ai ishte nën hetim nga LAPD dhe Departamenti i Shërbimeve për Fëmijë për përmbajtje të dyshuar pornografie fëmijësh në kompjuterin e tij – hetim që më vonë është mbyllur pa rezultat përfundimtar.
Bernad, nga ana e tij, mohoi akuzat dhe pretendoi se Sia kishte sajuar provat për t’i kufizuar atij të drejtat e kujdestarisë.
