Derby County rrëzohet nga kategoria, Rooney: “Dua të rindërtoj klubin, por me një kusht”

Derby County rrëzohet në League One, por Wayne Rooney dëshiron të qëndrojë dhe të rindërtojë klubin. Për ta bërë këtë, megjithatë, një kusht është i domosdoshëm: pronarë të rinj. Zbritja një nivel më poshtë e Rams u konfirmua matematikisht pasi skuadra humbi 1-0 përballë QPR. Lamtumira nga Championship natyrisht që ndodhi edhe për shkak të 21 pikëve të hequra klubit për parregullsi financiare. Pavarësisht trishtimit dhe zhgënjimit për një rënie të pashmangshme, Rooney dëshiron vetëm të mendojë për gjërat pozitive dhe të ardhmen. I pyetur se si u ndje pas rënies, ish-sulmuesi i United nuk kishte dyshime: “Krenar. Është një ndjenjë e çuditshme sepse gjithçka që kemi kaluar si grup, zhvillimi i ekipit, ka qenë vërtet pozitiv. Nuk kam parë kurrë një reagim të tillë nga tifozët përballë një ekipi të rënë. Mendova se ishte e pabesueshme. Sigurisht i zhgënjyer, i trishtuar, i tronditur, por krenar”. Natyrisht që Wayne u pyet edhe për të ardhmen e tij në Pride Park. 36-vjeçari është përfolur për të kaluar te Burnley ditët e fundit, por Rooney dëshiron të rindërtojë Derby County. Megjithatë, që kjo të ndodhë, është thelbësore që të ketë një pronësi të re: “Blerja duhet të bëhet, nëse nuk ndodh, nuk e di vërtet se ku do të përfundojë klubi. E ardhmja e klubit është në dyshim dhe nëse nuk ka një blerje të tillë edhe e ardhmja ime është në dyshim. Por nëse ka një ndryshim pronësie, atëherë unë dua ta rindërtoj këtë shoqëri. E shoh se çfarë do të thotë Derby County për të gjithë tifozët. Ky është një klub i veçantë, një klub i madh, të gjithë jemi krenarë që jemi këtu. Dua të kthej ato ditë të veçanta”. Por, për fat të keq, nuk është një situatë e thjeshtë: “Është një situatë komplekse. Ndihem më i trishtuar për lojtarët, sepse kemi grumbulluar 52 pikë dhe tani do të ishim të sigurt në kushte normale. Paguam çmimin e asaj që la pronari i mëparshëm. Nuk është faji i askujt përveç pronarit të mëparshëm dhe ne po paguajmë çmimin”.

Wayne Rooney.

Derby County LEGEND. ? pic.twitter.com/sbYCu3CJ9I

— Footy Limbs (@FootyLimbs) April 18, 2022

Rooney nuk ka folur vetëm me shtypin, por edhe me tifozët. Ish-sulmuesi i United u përball me një turmë tifozësh të Derbit që u mblodhën jashtë qendrës sportive të klubit pas ndeshjes. Disa fansa xhiruan video dhe më pas postuan klipet në rrjetet sociale: “Jemi mirënjohës për mbështetjen që keni treguar gjatë gjithë sezonit - theksoi Rooney - Ishte shumë e vështirë. Këto ishin kohë të vështira për ne dhe veçanërisht për ju (tifozët). Por ne bëmë më të mirën, dhamë gjithçka që mundëm. Fatkeqësisht kemi rënë nga kategoria, por tani do të sigurohemi që ky klub të kthehet”.