Byron Moreno është njeriu që theu ëndrrën e Italisë në Kupën e Botës 2002, duke u bërë njeriu më i urryer nga italianët në 120 minuta. Drejtimi i tij katastrofik i ndeshjes i kushtoi Italisë eliminimin nga Koreja e Jugut dhe 20 vjet më vonë, në mikrofonat e Gazzetta dello Sport, arbitri kontrovers ekuadorian mbron në mënyrë befasuese punën e tij. “Pas gjithë kësaj kohe, në rrjetet sociale marr ende ofendime nga tifozët italianë. E kam ndërgjegjen të pastër, jam i qetë – tha ai – Ajo ndeshje është në 3 gjykimet e mia më të mira në karrierë. Çfarë note do t’i jepja vetes? 8.5 plotësisht”.
Karton i kuq ndaj Tottit, një përjashtim i munguar kundër Koresë për një faull të keq ndaj Zambrottas dhe pozicione jashtë loje inekzistente. Një katastrofë autentike në transmetim mbarëbotëror, për të cilën Moreno nuk pendohet. E ekuadoriani i analizon kështu episodet më të kontestuara. “Nëse shikojmë videon, lojtari korean synon topin, vjen i pari dhe zgjat këmbën. Kapiteni italian bie duke u përpjekur të simulojë një faull për të cilin u ndëshkua për herë të dytë dhe, si rrjedhojë, u përjashtua. Rregullorja parashikonte të verdhën për simulim. I respektova rregullat, imazhet flasin vetë. Totti nuk proteston, të vetmit që e bëjnë këtë janë Vieri dhe Di Livio. Edhe kur Trapattoni godet xhamin që ndan stolin e tij nga drejtuesit e FIFA-s, është një reagim për shkak të zemërimit të momentit”.
