Kryetarja e LSI, Monika Kryemadhi bëri një akuzë ndaj ministres së Drejtësisë, Etilda Gjonaj se ekstradoi financierin e Habilajve, Nazer Seiti, në drejtim të Italisë për të mbrojtur Saimir Tahirin.
E ftuar te “5 pyetjet nga Babaramo” në Report Tv, Kryemadhi tha se edhe bashkëshorti i ministres është shkarkuar nga detyra për vjedhje.
“Ekstradimi i financierit të Habilajve është skandal i madh. Dhe parlamenti i 18 dhjetorit ishte një nga skenat më të turpshme, prandaj për mua reforma në drejtësi ka rënë qëkur shkoi Arta Marku në zyrën e Kryeprokurorit dhe me skandalin e ekstradimit të financierit të Habilajve, ky është skandal i madh.
Ne kemi një ministre Drejtësie që është më shumë një zëdhënëse shtypi e Edi Ramës, ajo ka një të kaluar aspak të mirë, burri saj është pushuar nga Drejtoria e Tatimeve për vjedhje.
Normal sjellja e saj kaq arbitrare me ekstradimin, nuk e dija dhe pastaj është më mirë të ekstradohet te drejtësia italiane, tregon se është e kapur shërbimi më flagrant që mund t'i bëhet grupit të Habilajve dhe shpëtimit të Saimir Tahirit", - u shpreh Kryemadhi.
