Një atentat i stilit mafioz ndodhi mbrëmjen e së hënës në një nga zonat më të populluara të Tiranës. Viktima ishte Devi Kasmi, 41-vjeç. Ai u qëllua me 5 plumba pistolete në rrugën Kongresi i Manastirit.
Dëshmitarë okularë thanë se autori i kishte ngritur pritë në një rrugë të pandriçuar mirë dhe ku mungojnë kamerat e sigurisë. Ai mbante një skafandër në kokë ndërsa pak më tej një tjetër person e priste me motor. Sapo e ka qëlluar ai është larguar nëpër rrugica me motorin që e priste. Plumbat i kanë marrë menjëherë jetën 41-vjeçarit.
Burime të lapsi.al pranë grupit të hetimit thanë se Devi Kasmi ishte një emër i njohur për forcat e rendit. Pak kohë më parë ai kishte ndryshuar emrin nga Dëfrim në Devi. Ai ishte një nga personat e dyshuar për një vrasje të ndodhur në Tiranë dhe për këtë vijonin hetimet. Në vendin e ngjarjes u gjetën 2 pistoleta. Hetuesit dyshojnë se njëra është e viktimës dhe tjetra e autorit i cili mund ta ketë flakur atë pas krimit. Gjithsesi kjo do të verifikohet.
Policia ka dyshime se viktima ishte i përfshirë në aktivitete kriminale kohët e fundit. Në të gjithë zonën janë ngritur postblloqe policie për të identifikuar dhe kapur autorët. ©LAPSI.al
