Shtetet e Bashkuara kanë ngritur për herë të parë mundësinë që Ukraina të tërhiqet nga pjesët e Donbasit që ende kontrollon, në këmbim të anëtarësimit në NATO.
Presidenti Volodymyr Zelensky bëri të ditur se çështja u ngrit nga negociatorët amerikanë gjatë përpjekjeve të fundit për arritjen e një marrëveshjeje me Rusinë. Megjithatë, deri tani nuk bëhet fjalë për një marrëveshje të formalizuar, por për një skenar të hedhur në tryezën e bisedimeve.
Zelensky përsëriti se Ukraina nuk është e gatshme të dorëzojë territor, por tha se një propozim i plotë mund t'u paraqitet qytetarëve përmes referendumit nëse shoqërohet me garanci konkrete sigurie. Sipas tij, paketa duhet të përfshijë garanci nga NATO dhe Bashkimi Europian, ruajtjen e një ushtrie të fortë ukrainase, mbështetje financiare dhe fonde për rindërtimin e vendit. Çdo marrëveshje do të duhej gjithashtu të shmangte njohjen e territoreve të pushtuara si pjesë të Rusisë.
Deklaratat vijnë pas bisedimeve të ndërmjetësuara nga SHBA në Abu Dhabi. Të dërguarit amerikanë Steve Witkoff dhe Jared Kushner u takuan më pas veçmas me Vladimir Putinin në Moskë dhe Zelenskyn në Dublin. Bisedimet nuk sollën një marrëveshje përfundimtare, por palët ranë dakord që përfaqësues europianë të përfshihen në negociatat e ardhshme.
Anëtarësimi i Ukrainës në NATO mbetet një nga çështjet më të vështira. Moska e kundërshton prej vitesh dhe vazhdon të kërkojë neutralitetin e Ukrainës, ndërsa Zelensky e ka përjashtuar këtë mundësi. Territori dhe garancitë e sigurisë mbeten kështu dy nga pengesat kryesore për një marrëveshje që mund t'i japë fund luftës.
