Një 48-vjeçar nga Pensilvania është arrestuar pasi akuzohet se shkaktoi dëme të mëdha në shtëpinë e familjes së tij duke përdorur një ekskavator. Shkak u bë një sherr me gruan e cila pak minuta më parë i kishte thënë se “martesa e tyre kishte mbaruar”.
Sipas policisë, gruaja e tij dhe dy vajzat e tyre ishin brenda në shtëpi në momentin e incidentit. Sipas autoriteteve, Eric Pierwsza përdori një ekskavator për të shkatërruar një pjesë të shtëpisë. Hetuesit besojnë se dëmi është aq i rëndë sa janë ngritur shqetësime në lidhje me integritetin strukturor të ndërtesës. Pamjet me dron treguan shkallën e shkatërrimit.
Banorët vendas shprehën tronditje për atë që ndodhi. Një fqinj u tha mediave: “Mendoj se është i çmendur. Kjo është arsyeja pse unë nuk pi.” Një tjetër banor bëri shaka: “Do të doja ta dija saktësisht se çfarë tha, në mënyrë që të sigurohesha që të mos e thoja kurrë. Jam i martuar prej 42 vitesh, por kurrë nuk e kam kërcënuar se do ta shemb shtëpinë.”
Gruaja e Piervszës i tha policisë se burri u kthye në shtëpi pas një nate konsumi të alkoolit dhe filloi të grindej me të. Kur ajo i njoftoi atij se martesa e tyre kishte mbaruar, hetuesit raportojnë se ai iu përgjigj me kërcënimin: "Nëse mbaron, do ta shemb shtëpinë".
Disa minuta më vonë, sipas policisë, 48-vjeçari hipi në ekskavator dhe filloi të shembte pjesë të shtëpisë, ndërsa gruaja dhe dy vajzat e tij ishin ende brenda. Efektivët e urgjencës thanë se mund të dëgjonin zëra dhe zhurmën e ekskavatorit gjatë telefonatës në 911.
Hetuesit shtojnë se kur shkatërrimi ndaloi, Piervsja u kthye brenda në shtëpi, mori një çantë palestre dhe u largua me makinë drejt Fawn Township përpara se të arrestohej. Ai akuzohet për shkatërrim, rrezikim të të tjerëve përmes sjelljes së rrezikshme dhe prishje të qetësisë. Gruaja e tij gjithashtu kërkoi një urdhër mbrojtjeje pas incidentit. Një seancë paraprake për çështjen është planifikuar për 9 qershor. ©LAPSI.al
