Një tjetër mesazh i qartë është përcjellë mbrëmjen e djeshme nga bulevardi përballë Kryeministrisë. Në ditën e 65-të të protestës, tubuesit formuan me shkronja gjigante mbishkrimin "NO DEALS" ("Nuk ka marrëveshje"), duke theksuar se nuk do të pranojnë asnjë kompromis për kërkesat e tyre. Sipas organizatorëve, mesazhi simbolizon qëndrimin e protestuesve se dorëheqja e kryeministrit Edi Rama mbetet një kërkesë e panegociueshme dhe se protesta do të vijojë deri në arritjen e këtij objektivi.
Mbishkrimi u shoqërua me pankarta dhe thirrje kundër qeverisë. Gjatë protestës u dëgjuan sërish sloganet "Rama, jep dorëheqjen", "Shqipëria kërkon revolucion", "Ju erdhi fundi" dhe "Pa rini nuk ka Shqipëri", që prej më shumë se dy muajsh shoqërojnë çdo tubim.
