Aktori francez Pierre Deny ka ndërruar jetë në moshën 69-vjeçare pas një beteje me Amyotrophic Lateral Sclerosis (ALS), një sëmundje progresive që prek sistemin nervor dhe shkakton humbje graduale të kontrollit të muskujve.
Deny u bë i njohur për publikun ndërkombëtar me rolin e Louis de Léon në serialin Emily in Paris, ku u shfaq në sezonet e tretë dhe të katërt si drejtori ekzekutiv i kompanisë së modës JVMA dhe babai i Nicholas de Léon.
Lajmi për vdekjen e tij u konfirmua nga vajzat e aktorit përmes një deklarate prekëse.
“Me dhimbje të thellë njoftojmë ndarjen nga jeta të Pierre Deny, pas një forme të papritur dhe të rëndë të ALS”, thuhej në reagimin e familjes.
Aktori kishte një karrierë të gjatë në televizionin francez dhe ishte pjesë e më shumë se 500 episodeve të serialit të njohur Demain nous appartient (“Tomorrow Belongs To Us”), ku fitoi vlerësime për interpretimet e tij.
