Sulmuesi spanjoll Lucas Perez, aktualisht pjesë e Cadiz dhe me të kaluar te Arsenal dhe Deportivo La Coruna ndër të tjera, është mashtruar për 340 mijë euro me teknikën e quajtur “Rip Deal”. Bëhet fjalë për një metodë kriminale që nuk përdor dhunë, por bazohet te shkathtësia: konsiston në zëvendësimin e parave të vërteta – të treguara personit të mashtruar si pagesë për mallrat e blera prej tij – me para false.
Çfarë i ndodhi Lucas Perez: një “pako” prej 340 mijë eurosh
Futbollisti 37-vjeçar galician iu drejtua forcave të rendit duke shpjeguar se disa kohë më parë kishte publikuar një njoftim për shitjen e makinës së tij dhe disa objekteve luksoze që zotëronte. Pasi përzgjodhi përgjigjet e marra, Perez pranoi shitjen e sendeve në fjalë, duke organizuar një takim me personat e interesuar për të diskutuar kushtet e transaksionit.
Takimi shkoi mirë, madje u arrit marrëveshja për pagesë në cash dhe u caktua një takim i dytë për të mbyllur marrëveshjen. Gjithçka shkoi sipas planit: gjatë takimit të dytë u bë pagesa e dakordësuar dhe u dorëzuan mallrat e shitura, mes të cilave një Lamborghini, katër orë luksoze, tre unaza ari me diamante dhe nëntë veshje të shtrenjta. Shuma e saktë që mori (ose mendonte se kishte marrë…) Perez ishte 340 mijë euro, nga të cilat 180 mijë për objektet me vlerë dhe 160 mijë si parapagim për automjetin.
Paratë iu dorëzuan cash në një çantë dhe u numëruan para futbollistit me një makinë numërimi banknotash. Asgjë nuk e bëri Perez të dyshonte se kishte marrë “pakon” klasike. Sulmuesi i Cadiz e kuptoi vetëm kur u kthye në shtëpi dhe zbuloi se të gjitha banknotat ishin false, përveç vetëm tre kartëmonedhave nga 100 euro.
Si funksionon mashtrimi “Rip Deal”
Mashtrimi i njohur si “Rip Deal” funksionon kështu: mashtruesit përgjigjen ndaj një njoftimi për shitjen e mallrave luksoze (makina, ora, bizhuteri etj.), tregohen shumë të interesuar dhe propozojnë pagesë në cash. Më pas organizojnë një ose më shumë takime, shpesh në hotel, i tregojnë shitësit një çantë plot me para të vërteta dhe ndonjëherë i numërojnë para viktimës me makinë numërimi për të fituar besimin e saj.
Në momentin e dorëzimit real të parave, bëjnë një shkëmbim të shpejtë të çantës ose të pakove të banknotave, duke zëvendësuar paratë e vërteta me kartëmonedha false të cilësisë së lartë, ose çanta përmban që në fillim para false, por mashtruesit i tregojnë viktimës vetëm disa banknota të vendosura sipër ose në një pako prove (pikërisht ajo që me shumë mundësi ndodhi në rastin e Perez). Pasi shitësi dorëzon mallin, ata zhduken dhe viktima e kupton mashtrimin vetëm më vonë, kur zbulon se ka marrë (pothuajse vetëm) para false.
Këtë herë megjithatë gjërat nuk shkuan mirë për mashtruesit: dy burra (një francez dhe një belg) u ndaluan nga Policia Kombëtare në Madrid. Gjatë arrestimit iu gjetën 50 mijë euro cash.
