Goli i shpejtë pas vetëm dy minutash nga Saelemaekers, kualifikimi drejt Champions League sezonin e ardhshëm shumë pranë (mjaftonte edhe barazimi, red.) dhe një reagim në tribunën e autoriteteve që të bën të mendosh dhe duket se tregon më shumë se një mijë fjalë… Ajo që thuhet se ka ndodhur në “San Siro” gjatë ndeshjes së fundit të kampionatit mes Milanit dhe Cagliarit hap “kutinë e Pandorës” në klubin kuqezi, duke zbuluar se ndarja totale mes pronësisë dhe ish-ambientit sportiv ka rrënjë të hershme.
Detajet e kësaj prapaskene janë zbuluar nga Monica Colombo, e cila në faqet e Corriere della Sera (edicioni i Milanos) ka përshkruar një situatë në të cilën një sukses i mundshëm në fushë për ekipin e Allegrit do të kishte komplikuar planet e drejtuesve të vendosura më parë.
Festimi i Tares dhe ftohtësia e drejtuesve të tjerë
Thelbi i këtij informacioni përqendrohet te momenti i golit të avantazhit të Milanit të shënuar nga Alexis Saelemaekers. Në atë çast, ndërsa stadiumi shpërthente nga gëzimi, në tribunën e nderit ku ndodheshin drejtuesit e klubit kuqezi, thuhet se ndodhi një skenë e pazakontë: “Tregohet se në golin e Saelemaekers në minutën e 2’, vetëm Igli Tare u ngrit në këmbë për të festuar avantazhin e Milan. Drejtuesit e tjerë mbetën të ftohtë, thuajse të pakënaqur nga drejtimi që po merrte ndeshja”. Objektivi i kualifikimit në Europën elitare ishte kërkuar qartë në fillim të sezonit nga trajneri Max Allegri (për të cilin do të aktivizohej rinovimi automatik, red.) dhe drejtori sportiv shqiptar, dhe arritja e tij do ta bënte pothuajse të pamundur largimin e tyre në fund të sezonit.
Hija e Ibrahimovic dhe sherri në restorant
Pas kësaj ftohtësie të drejtuesve qëndron figura e Zlatan Ibrahimovic, këshilltar i lartë i RedBird, marrëdhëniet e të cilit me ish-trajnerin dhe ish-drejtorin sportiv nuk kanë qenë aspak të mira. Prishja mes Allegrit dhe suedezit, sipas Corriere della Sera, nuk është e re dhe lidhet me një episod të ndodhur në një restorant në Milano: një darkë që duhej të ishte e qetë u shndërrua në një debat të ashpër për një çështje të parëndësishme — zgjedhjen e portierit të tretë për sezonin e ardhshëm — në prani të drejtorit ekzekutiv Giorgio Furlani dhe vetë Tares. Tensioni u rrit deri në atë pikë sa thuhet se Tare është dashur të ndërhynte fizikisht për të ndarë trajnerin dhe ish-sulmuesin.
Një revolucion i planifikuar në Londër
Planet për ndryshimet e mëdha thuhet se ishin hartuar prej kohësh. Siç konfirmojnë edhe Gianluca Di Marzio dhe Matteo Moretto, drejtuesit e RedBird kishin javë që po përgatitnin të ardhmen e Milanit pa Allegrin dhe Taren, dhe udhëtimet e takimet strategjike në Londër shërbenin pikërisht për të hedhur bazat e projektit të ri kuqezi. Moskualifikimi në Champions League më pas do të shërbente si pretekst perfekt për të justifikuar shkarkimet dhe për të nisur revolucionin e planifikuar më herët. Një ndarje e thellë që, pas golit të Saelemaekers, është bërë publike.
