Në qershor, ose maksimumi brenda kësaj vere, Manchester City do ta mësojë nëse do të duhet të mbrohet në apel apo nëse do t’ia dalë “për qime” përballë akuzave (plot 115 shkelje) për shkeljen e rregullave financiare në periudhën mes viteve 2009 dhe 2018. Ja pse kuotat e bastexhinjve për rënien e Citizens nga kategoria sezonin e ardhshëm janë shumë të ulëta (14/1 kundrejt 150/1 për Arsenal, Manchester United dhe Liverpool), përveç rrezikut të sanksioneve shtesë si zbritje pikësh ose madje anulimi i të gjithë titujve të fituar gjatë periudhës nën hetim.
Akuzat ndaj Manchester City
Akuzat e ngritura janë të llojeve dhe niveleve të ndryshme serioziteti për veprime që sipas hetuesve kishin si qëllim sigurimin e një avantazhi sportiv: fryrje të bilanceve financiare, pagesa “në të zezë” për trajnerë dhe lojtarë, si edhe paraqitje dokumentesh të rreme ndaj Premier League dhe UEFA-s. Një situatë pasigurie totale që mund të tronditë shumë shpejt historinë e fundit të kampionatit anglez, me skuadrën e Enzo Maresca (që ka zëvendësuar Pep Guardiola) që konsiderohet shumë më e rrezikuar për të përfunduar në Championship sesa Crystal Palace, Nottingham Forest dhe madje Tottenham, që mezi shmangën rënien këtë sezon.
Çfarë sanksionesh rrezikojnë Citizens
A rrezikon vërtet Manchester City rënien nga kategoria? Në letër, po. Edhe pse në realitet mund të goditet me masa të tjera si zbritje pikësh (të shpërndara në disa sezone), gjoba financiare, heqje të disa titujve, apo kufizime në merkato. Sanksione më pak tronditëse, por gjithsesi të rënda dhe të menduara për të mos destabilizuar tepër kompeticionin.
Kur do të vijë vendimi
Kanë kaluar më shumë se 16-18 muaj nga fundi i seancës dëgjimore dhe komisioni përgjegjës ndodhet ende në fazën e përpunimit të vendimit. Përditësimet e fundit tregojnë se vendimi pritet në javët e ardhshme, menjëherë pas përfundimit të sezonit 2025-2026, në të cilin Manchester City luftoi me Arsenal për titullin e Premier League. Dhe në çdo rast, pas shpalljes së vendimit, çështja pritet të zgjasë edhe disa vite të tjera në rast se klubi apelon.
Cilat janë sanksionet e mundshme
Rënia nga kategoria është një nga hipotezat më të këqija sipas rregullores. Dhe është një ndëshkim që në Angli shumëkush e konsideron pak të mundshëm sepse do të ishte një masë pa precedent. Shumë më të mundshme konsiderohen zbritja e pikëve, kufizime të rënda në merkaton e transferimeve, përjashtimi/pezullimi nga Premier League dhe dëmshpërblime për klubet e tjera. Megjithatë “goditja e fortë” pritet të vijë menjëherë: disa ekspertë janë të bindur se komisioni do ta ndajë vendimin në dy pjesë: fillimisht do të shprehet mbi fajësinë ose jo të Manchester City dhe më pas do të përcaktojë sanksionet specifike.
Çfarë mund të ndodhë realisht
Janë tre skenarë të mundshëm dhe më i besueshmi është ky: City shpallet fajtor për shumicën e akuzave, merr një zbritje të madhe pikësh (të paktën 60 pikë), një gjobë shumë të rëndë dhe humbjen e disa titujve (maksimumi 3). Nëse ndodh ky skenar, sezonin 2026-2027 Manchester City do ta gjente veten në luftë për mbijetesë. Skenari i dytë parashikon sanksione më të lehta (gjobë dhe zbritje më të vogël pikësh), por vetëm nëse avokatët e klubit arrijnë të rrëzojnë ose dobësojnë shumicën e akuzave. Në fund është opsioni që konsiderohet më pak i mundshëm dhe që shkon nga një ekstrem në tjetrin: pafajësi totale ose përjashtim i menjëhershëm pa apel.
