Këngëtarja e njohur amerikane Katy Perry ka folur hapur për sfidat e shëndetit mendor gjatë një prej periudhave më të vështira të jetës së saj, duke e përshkruar vitin e kaluar si “më të keqin dhe njëkohësisht më të mirin”.
Në një intervistë për “The Zane Lowe Show” në Apple Music, ajo u rikthye te ndarja e saj nga aktori Orlando Bloom, me të cilin kishte qenë në një lidhje prej rreth nëntë vitesh dhe me të cilin ka një vajzë.
Perry tregoi se gjatë turneut të saj ishte përballur me momente të vështira emocionale, duke theksuar se ka kaluar një periudhë intensive si në jetën publike ashtu edhe në atë private.
“Viti i kaluar ishte shumë i vështirë… po qaja dhe po përballesha me shumë gjëra,” u shpreh ajo, duke shtuar se ka menduar shpesh për presionin emocional që po përjetonte.
Këngëtarja tha gjithashtu se, pavarësisht sfidave, vendosi të vazhdojë përpara, duke e përshkruar këtë periudhë si një proces reflektimi dhe ndryshimi personal.
Në intervistë, ajo la të kuptohet se pas kësaj periudhe të vështirë ka gjetur stabilitet në jetën e saj personale dhe se ndihet më e “qetë dhe e balancuar”.
Pas ndarjes nga Bloom në vitin 2025, Perry ka qenë në qendër të vëmendjes edhe për jetën e saj sentimentale, përfshirë lidhjen e përfolur me ish-kryeministrin kanadez Justin Trudeau.
Ajo gjithashtu konfirmoi se ndihet mirënjohëse për ndryshimet në jetën e saj dhe se është e fokusuar në muzikë dhe projekte të reja.
