“Detyra ime është që, nëse diçka nuk mjafton për të fituar, nuk mund të kënaqem me kaq. Detyra ime është të gjej mënyra të tjera për të fituar, të inovoj, të gjej qasje të ndryshme nga ato të mëparshmet. Dhe kjo është ajo që kemi bërë deri tani”. Dy ditë para finales së madhe të Champions League, trajneri i Arsenal, Mikel Arteta, e sheh sfidën me PSG si një tjetër takim të madh me historinë për klubin anglez.
Pas triumfit në Premier League, “Topçinjtë” vazhdojnë të ëndërrojnë. “Dikush atje lart ka rreshtuar planetët që kjo të ndodhte - thotë trajneri spanjoll në një intervistë të gjatë për Marca duke folur për fitimin e kampionatit -. Në vitet e kaluara kemi shkuar pranë, por mungonte diçka. Atmosfera ka qenë ndryshe që nga fillimi. Isha i bindur se do të ishim shumë pranë. Jo te fitorja, sepse ajo varet nga shumë faktorë. Detyra ime ishte t’i bindja të ndiheshin më të mirët. U kam dhënë energji dhe u kam thënë të argëtohen si kurrë më parë”.
Tani përballë është PSG e Luis Enrique, rivali mik për të cilin Arteta ka vetëm fjalë vlerësimi. “E kujtoj me shumë dashuri për mënyrën se si sillej me të rinjtë dhe për mënyrën si ishte si lojtar - tregon trajneri i anglezëve -. Si trajner, ai ka treguar lidership duke ndjekur një rrugë të caktuar dhe, pavarësisht të gjitha kritikave, ka vazhduar përpara dhe në fund ka fituar siç bëri. Është një shembull për të gjithë”.
