Barry Keoghan ka thyer më në fund heshtjen lidhur me thashethemet që qarkullonin se ai kishte tradhtuar Sabrina Carpenter.
Aktori irlandez foli hapur gjatë podcast-it “Friends Keep Secrets”, ku pranoi se prej kohësh kishte shmangur vëmendjen publike dhe rrjetet sociale.
“Ndjej se jam në një hapësirë të sigurt për ta thënë këtë… por kam shmangur shumë gjëra,” u shpreh ai. “U largova nga Instagrami dhe rrjetet sociale. Ndalova së shkuari në evente dhe madje edhe së socializuari.”
Sipas tij, ky vendim erdhi si pasojë e një “narrative të pavërtetë” që qarkullonte për jetën e tij personale, për të cilën ai nuk kishte reaguar më parë.
“Nuk kam konfirmuar apo thënë kurrë asgjë për këtë… thjesht u zhduka,” tha aktori, duke iu referuar zërave për tradhti.
Kur u pyet drejtpërdrejt nëse bëhej fjalë për akuza për pabesi në marrëdhënie, Keoghan e pranoi se pikërisht ato ishin thashethemet që po qarkullonin.
Ai theksoi se nuk dëshiron të përfshijë persona të tjerë në këtë çështje, duke respektuar privatësinë e ish-partneres së tij.
“Nuk dua të flas në emër të askujt dhe as të përmend apo përfshij njerëz të tjerë. Kur je në një lidhje publike, gjërat amplifikohen shumë,” u shpreh ai.
Sabrina Carpenter dhe Keoghan nisën të përfliteshin si çift në fund të vitit 2023, ndërsa ndarja e tyre u konfirmua në dhjetor 2024. Pas ndarjes, u përhapën zëra se aktori kishte tradhtuar këngëtaren me influenceren Breckie Hill, pretendime që më vonë u mohuan nga kjo e fundit.
Keoghan, i njohur për rolet e tij në filma të suksesshëm, zgjodhi të tërhiqet përkohësisht nga rrjetet sociale edhe për shkak të reagimeve dhe kritikave që mori online pas këtyre lajmeve.
