Këngëtari i njohur spanjoll Alejandro Sanz ka folur hapur për përvojën e tij me depresionin gjatë një interviste në emisionin “Lo de Évole” në televizionin La Sexta.
Artisti tregoi momentet e vështira që përjetonte pas koncerteve, duke pranuar se ankthi ishte i fortë:
“Kur zbrisja nga skena dhe shihja njerëzit, filloja të dridhesha. Qëndroja në dhomat e zhveshjes derisa largohej personi i fundit i dehur. Tani nuk e bëj më këtë,” u shpreh ai.
Pavarësisht sfidave, këngëtari tha se aktualisht po jeton një moment shumë të mirë në jetën e tij:
“Jam shumë rehat me gjithçka që po më ndodh – me familjen, me ambientin tim dhe me jetën në përgjithësi.”
Ai konfirmoi gjithashtu se është i lumtur në lidhjen e tij me partneren Stephanie Cayo, e cila u shfaq edhe përmes një videotelefonate gjatë intervistës.
“Është shumë bukur të jesh i dashuruar. Dhe po, unë jam i dashuruar,” tha ai.
Një tjetër moment interesant i intervistës ishte rrëfimi për bashkëpunimin me Shakira në hitin “La Tortura”.
Sanz pranoi se mes tyre kishte një “ndjenjë”, por asgjë nuk ndodhi për shkak të rrethanave personale.
“Nuk po them që nuk kishte diçka, por ajo kishte një partner, i cili ishte edhe miku im, dhe unë gjithashtu isha në një lidhje. Jam i lumtur që nuk ndodhi asgjë, sepse miqësia jonë është shumë e bukur dhe nuk do të doja ta humbisja,” u shpreh ai.
Ai shtoi se shpesh bëjnë shaka për këtë situatë, ndërsa vlerësoi maksimalisht profesionalizmin e artistes kolumbiane:
“Ajo është një gjeni, një 10. Nuk ndalet derisa gjithçka të jetë perfekte.”
