Brooklyn Beckham ka mbuluar tatuazhin që ia kishte dedikuar babait të tij, David Beckham, mes përçarjes së thellë familjare.
Tatuazhi me spirancë në krahun e djathtë të Brooklyn-it mbante më parë mbishkrimin “DAD” me shkronja të mëdha në qendër. Megjithatë, në fotot e reja të siguruara nga The Sun, ku Brooklyn shihet në Los Angeles me bashkëshorten e tij Nicola Peltz, mbishkrimi duket se është mbuluar plotësisht me një dizajn të ri që përfshin një yll deti dhe dy jelekë shpëtimi.
Një burim i tha medias se Brooklyn i është nënshtruar trajtimit me lazer për të ndryshuar tatuazhin që më parë ishte dedikuar babait të tij. “Ai donte ta hiqte,” u shpreh burimi.
Sipas të njëjtit burim, Brooklyn, 26 vjeç, ka mbuluar gjithashtu edhe tatuazhin në kraharor që ia kishte dedikuar nënës së tij, Victoria Beckham. “Të shohësh Brooklyn-in duke mbuluar tatuazhin për Victoria dhe tani edhe atë për babain e tij do të jetë shumë e dhimbshme,” tha burimi. “Duket shumë mizore.”
Përçarja në familjen Beckham u përshkallëzua muajin e kaluar, pasi Brooklyn publikoi një deklaratë të ashpër në Instagram Stories, ku sulmoi prindërit e tij.
Ai deklaroi se nuk dëshironte pajtim me familjen dhe i akuzoi David dhe Victoria Beckham se po përpiqeshin t’i shkatërronin martesën me Nicola Peltz, 31 vjeçe. Gjithashtu, ai pretendoi se Victoria kishte kërcyer “në mënyrë të papërshtatshme” me të gjatë dasmës së tij në vitin 2022.
Ndërkohë që pjesa tjetër e familjes Beckham ka dalë publikisht e bashkuar mes gjithë titujve mediatikë rreth konfliktit me Brooklyn-in, babai i Nicola-s, miliarderi Nelson Peltz, ka thyer heshtjen për herë të parë.
“Familja ime ka qenë në shtyp kohët e fundit? Nuk e paskam vënë re fare,” tha ai me shaka gjatë një sesioni pyetje-përgjigje në eventin WSJ Invest Live në Florida.
Nelson Peltz shtoi se këshilla e tij për familjen ishte të “qëndronin larg mediave” dhe se Brooklyn dhe Nicola po shkonin “shumë mirë”.
“Vajza ime dhe familja Beckham janë një histori tjetër dhe nuk është për t’u trajtuar sot këtu,” tha ai. “Por mund t’ju them se vajza ime është mirë, dhëndri im Brooklyn është mirë dhe pres që ata të kenë një martesë të gjatë dhe të lumtur.”
