
Një 63-vjeçar ka humbur jetën dhe disa persona të tjerë kanë mbetur të plagosur si pasojë e një aksidenti rrugor të ndodhur mëngjesin e sotëm në qendër të Orikumit. Viktima është identifikuar si Xhevair Xhelili, i cili udhëtonte në njërin prej dy automjeteve që u përplasën me njëri-tjetrin. Sipas informacioneve paraprake, në automjetin tjetër ndodheshin disa punëtorë të huaj, të cilët po udhëtonin drejt zonës bregdetare të Vlorës për të shkuar në punë.
Personat e plagosur janë transportuar në spitalin e Vlorës për ndihmë mjekësore, ndërsa trupi i 63-vjeçarit është dërguar në morg. Policia ka mbërritur në vendngjarje dhe po heton për të përcaktuar shkaqet dhe rrethanat e aksidentit.