Jim Curtis, i dashuri i Jennifer Aniston, ka folur hapur për herë të parë rreth mënyrës se si nisi romanca e tij me aktoren e famshme, gjatë një interviste në emisionin “Today”, të hënën.
Hipnoterapisti 50-vjeçar, i cili ishte i ftuar për të promovuar librin e tij të ri “Book of Possibility”, tregoi se gjithçka nisi shumë thjesht.
“Na prezantuan miq të përbashkët,” tha Curtis. “Zbuluam që kishim shumë miq të përbashkët rreth nesh dhe thjesht filluam të bisedonim.”
Kur moderatori Craig Melvin bëri shaka duke pyetur nëse ishin personazhet Joey apo Ross nga seriali “Friends” ata që i kishin bashkuar, Curtis u përgjigj me humor se “ishin të gjithë personazhet e ‘Friends’”, përpara se të sqaronte se lidhja e tyre u ndërtua gradualisht.
“Biseduam për një kohë të gjatë dhe u afruam shumë,” tha ai, duke pranuar se romanca “mori kohë” për t’u konkretizuar.
Edhe pse nuk dha një datë të saktë, Curtis konfirmoi se ata janë bashkë prej disa muajsh. “Gati një vit,” shtoi ai.
Jennifer Aniston dhe Jim Curtis u panë për herë të parë bashkë verën e kaluar, gjatë pushimeve në Spanjë me miqtë e saj të famshëm. Katër muaj më vonë, çifti e bëri lidhjen zyrtare edhe në Instagram.
Në nëntor 2025, Aniston publikoi një foto bardhë e zi nga festa e 50-vjetorit të Curtis, duke shkruar: “Gëzuar ditëlindjen, dashuria ime. I çmuar”. Nga ana e tij, Curtis reagoi me fjalë romantike: “Nëse kjo është një ëndërr, nuk dua të zgjohem.”
Po atë muaj, aktorja e quajti partnerin e saj “të jashtëzakonshëm, shumë normal dhe shumë të mirë” në një intervistë për revistën Elle.
Jennifer Aniston ka qenë e martuar më parë me Brad Pitt dhe Justin Theroux. Ky i fundit madje i ka dhënë “miratimin” publik lidhjes së saj të re, duke pëlqyer postimin e çiftit në Instagram.
Sa i përket Curtis, ai është i divorcuar dhe ka një djalë adoleshent, Aidan, nga martesa e mëparshme.
