Vetëm pak ditë pasi mori nominimin e tij të parë për Oscar për rolin e Creature në filmin “Frankenstein” të Guillermo del Toro-s, Jacob Elordi, 28 vjeç, po përflitet si një kandidat i mundshëm për të qenë James Bond-i i ardhshëm.
Të enjten, disa media ndërkombëtare, përfshirë Yahoo, raportuan se aktori i “Saltburn” dyshohet se është takuar me regjisorin e ardhshëm të sagës së Bond-it, Denis Villeneuve.
Lajmi ka ndezur menjëherë debat mes fansave të 007-ës, ku reagimet kanë qenë të përziera — kryesisht për shkak të gjatësisë së pazakontë të Elordit, 1.96 metra.
“Armiku i tij këtë herë do të jenë kornizat e ulëta të dyerve,” ironizoi një përdorues në rrjetet sociale.
Një tjetër shkroi: “Është shumë i gjatë për James Bond. Do t’i duhet një furgon, jo një makinë sportive.”
Një koment tjetër në platformën X tallte idenë e një agjenti sekret kaq të gjatë:
“James Bond zhduket në turmë… ndjekësit e këqij: ‘Ku shkoi?’ Pastaj shohin kokën e Bond-it 1.96 m mbi turmë: ‘Ah, ja ku është.’”
Një përdorues në Reddit shkroi se Elordi është “shumë i gjatë, shumë i famshëm dhe shumë i ri” për rolin, duke shtuar se James Bond “nuk është Jack Reacher apo Superman” dhe se një agjent sekret nuk duhet të bie aq shumë në sy.
Megjithatë, fakti që Elordi është australian nuk e përjashton automatikisht nga roli. Pierce Brosnan ishte irlandez, ndërsa George Lazenby, i cili luajti Bond-in në vitin 1969, ishte gjithashtu australian.
Pavarësisht talljeve, disa fansa e mbështesin idenë.
“Do të ishim jashtëzakonisht me fat të kishim Jacob Elordi si James Bond,” shkroi një komentues.
“Ai ka sharmin e Brosnan-it, errësirën e brendshme, intensitetin dhe karizmën. Kujt i intereson gjatësia?”
