Gazment Bardhi akuzoi drejtpërdrejt kryeministrin Edi Rama, si bashkëpuntor të Belinda Ballukut, i detyruar ta mbrojë atë pas vendimit të Gjykatës së Posaçme për ta pezulluar nga detyra si zëvendëskryeministre dhe ministre e Infrastrukturës. Në një deklaratë për mediat, Bardhi argumentoi se refuzimi i Ramës për ta shkarkuar ministren nuk është thjesht një zgjedhje politike, por një akt vetëmbrojtjeje nga një aferë ku, sipas tij, kryeministri dhe zëvendësja e tij janë të lidhur së bashku.
"Pse nuk ka fuqi Edi Rama që ta shkarkojë Belinda Ballukun, por sfidon drejtësinë, sfidon shqiptarët dhe përbuz parimet themelore të vendeve demokratike perëndimore? Përgjigja është vetëm një: Ai është në krye të çdo afere të madhe korruptive në vend. Edi Rama dhe Belinda Balluku janë bashkë në aferën e Tunelit të Llogarasë. Kompaninë fituese të tunelit të LLogarasë nuk e përcaktoi apo paracaktoi Belinda Balluku, por e paracaktoi Edi Rama dhe Belidna Balluku. Dhe siç ndodhen mesazhet e Belindës në telefonin e Ervis Berberit për zbatimin e një urdhri të kundraligjshëm të shefit të saj, ashtu ndodhen edhe mesazhet e Edi Ramës në telefonin e Belinda Ballukut.Kjo është fotografia e datës 3 qershor 2021, fiks tre muaj para se të hapej gara për tunelin e llogarasë që përcakton qartë se Edi Rama ka dalë dhe paracaktuar bashkë me Belindën e tij, kompaninë fituese të tunelit të Llogarasë duke i dhënë 50 mln më shumë seç ishte oferta gjatë garës së parë të anuluar. Kjo nuk bën vaki në asnjë vend të Europës, që kryeministri dhe zëvendësja e tij të pozojnë me kompanitë e paracaktuara përpara se të hapin garën duke shkelur konkurrencën e lirë, por mbi të gjitha duke shkelur vlerat e BE-së që përcaktohen si të tilla edhe në Marrëveshjen e Stabilizim Asocimit. Askush të mos mendojë se Edi Ramës i dhimbset Belinda Balluku. Fati i saj tashmë është përcaktuar, pro ai nuk e shkarkon atë, sepse po merr kohë për të mbrojtur veten e tij" u shpreh Bardhi.
Sipas Bardhit, vendimi i GJKKO-së duhet të kishte prodhuar një reagim të menjëhershëm nga kreu i qeverisë, në linjë me praktikat europiane, por Rama “zgjodhi të sillet si avokat i një të pandehure”, duke sfiduar hapur drejtësinë. Ai pretendon se zvarritja e shkarkimit lidhet me faktin që Balluku, tashmë e hetuar për të paktën dy tendera me vlerë të përgjithshme mbi 200 milionë euro, “e ka ulur në gjunjë kryeministrin”.
Bardhi solli si kontrast rastin e ish-kryeministrit portugez António Costa, i cili dha dorëheqjen sapo nisi një hetim ndaj tij, pa pritur akuzë formale. Sipas tij, ky është standardi europian që Shqipëria nuk po e ndjek. Në vend të kësaj, ai thotë se Rama po ushtron presion mbi drejtësinë dhe po e trajton vendimin e gjykatës si ndërhyrje në ekzekutiv, duke krijuar idenë se qeveria është e çliruar nga detyrimi për të zbatuar ligjin.
