“Unë mendoj që nuk kanë qenë ndeshje të lehta, si ajo në Ballsh edhe kjo sot. Dua të komplimentoj Erzenin pasi ka bërë një lojë shumë të mirë dhe na vunë në vështirësi". Gentian Mezani i gëzohet dy fitoreve të para, në dy ndeshje në pankinë, që kur zëvendësoi Vukicevic. Në fillim Bylis e tani edhe Erzeni. Gjashtë pikë, që e afrojnë Laçin me zonën europiane të renditjes. Një objektiv që tekniku i bardhezinjve e ka përcaktuar tashmë si kryesor, pas 1-0 në shtëpi me Erzenin. "Sigurisht që Laçi ka synim Kupat e Europës dhe do luftojmë për të arritur atje. Guindo është afrimi ynë i parë. Duhet të përmirësojmë mënyrën e të luajturit, të krijojmë personalitet në fushë, do punojmë sa më shumë për të vazhduar edhe më përpara”, u shpreh Mezani pas ndeshjes.
Krubinasit vazhdojnë të rikuperojnë lojtarë të rëndësishëm, si Babatunde, që fitoi penalltinë për golin e Ujkës. E megjithatë, problemet janë ende evidente, si tregon Mezani: "Dua të rritemi çdo ndeshje e më shumë kemi pasur probleme gjatë pushimit, lojtarët i kemi pasur në gjendje të keqe shëndetësore si Mazrekaj. Dua të arrijmë lojë ofensive…".
Impakti i parë me një kampionat të ekuilibruar është bërë, por Mezani ka idenë e tij për Superioren e këtij edicioni: "Unë shpresoj që në vazhdim të përmirësohemi më tepër, këto fitore na bëjnë mirë, nuk ka ndeshje të lehta, dhe ajo me Kukësin do të jetë një luftë, është një kampionat i çuditshëm, mund të fitosh jashtë dhe të humbësh brenda. Patëm probleme në pjesën e dytë dhe kundërshtari merr fuqi".
