Pas shembjes në derbi, Lazio duket se ka gjetur rrugën e duhur me fitoret ndaj Sassuolos dhe ndaj Genoas. Pikërisht ndaj ligurëve, bardhekaltrit fituan dhe bindën mbi të gjitha falë një paraqitje të shkëlqyer sulmuese, me Ciro Immobile, mbretin e padiskutueshëm të ndeshjes me një tregolësh. Ai që nuk shkëlqeu ishte Felipe Anderson, një xhevahir që Maurizio Sarri, në (pothuajse) çdo intervistë mundohet ta inkurajojë të japë më të mirën, duke e konsideruar një nga lojtarët potencialisht më të fortë që ka Lazio.
“Nëse Felipe do të luante gjithmonë me 100%, ai nuk do të ishte te Lazio, por as në Itali – filloi Maurizio Sarri në mikrofonat e Sky Sport. Ka cilësi të jashtëzakonshme fizike dhe teknike por ka momente luhatëse, ndonjëherë mungon. Ndonjëherë i them që po bën rolin e arbitrit anësor, por duke folur me djemtë që kishin luajtur me të disa vite më parë më thonë se është përmirësuar shumë në krahasim me të kaluarën, se momentet e rënies janë më të pakta se më parë. Shpresojmë që ta bëjmë të japë 100%, sepse nëse do ta mbyllte karrierën pa e bërë këtë, do të më vinte shumë keq, sepse shoh gjëra të mëdha tek ai”.
FELIPE ANDERSON: “GOLI NDAJ INTERIT NUK KA FARE LIDHJE”
Felipe Anderson u ble nga Lazio në vitin 2013, i marrë nga kampionati Paulist ku formonte dyshen e artë të Santos me Neymar. Pesë vite me bardhekaltrit, më pas raporti me Simone Inzaghin u prish dhe në vitin 2018 u largua nga kryeqyteti italian për t'iu bashkuar atij anglez. Tre vjet me Ëest Ham, pastaj Porto ku luajti me pikatore, përpara se të kthehej te Lazio verën e kaluar. Pas një faze të parë të mirë, Pipe u zhduk plotësisht në të dytën, pas golit të diskutueshëm ndaj Interit. I intervistuar nga Lazio Style Radio pas fitores ndaj Genoas, ai tha: “Kam pasur një rënie të vogël fizike, nuk ka lidhje me episodin që ndodhi gjatë golit tim në Lazio-Inter. U ktheva këtu se kam karakter, ndryshe nuk do të kthehesha. Kam pasur disa momente të vështira në karrierën time, por tani dua të luftoj dhe të fitoj me këtë fanellë”.
