Rreth 4 orë ka zgjaturr protesta e thirurr nga Sali Berisha në selinë e Partisë Demokratike, për të larguar prej aty Lulzim Bashën, kryetarin e shkarkuar me referendum nga anëtarësia e PD-së. Pak pasi disa prej mbështetësve të Berishës hyn brenda në disa ambiente të selisë blu, nga brenda vërshuan shkopinjtë e drurit dhe gazi lotsjellës. Nuk dihet se kush ishin ata që dhunuan protestusit dhe lëshuan gazin lotsjellës.
Prej disa ditësh grupimi i Sali Berishës ka folur për mercenarë dhe njerëz me rekorde kriminale që u rekrutuan nga Lulzim Basha. Mes protestuesve pati edhe të plagosur. Truproja i Lulzim Bashës, ish-efektivi i Gardës së Republikës, Astrit Gosturani, është fiksuar nga kamerat duke hedhur gaz lotsjellës në ballkonin e selisë blu, si dhe duke dhunuar protestuesit.
Më pas në mënyrë të koordinuar Lulzim Basha dhe Edi Rama futën forcat RENEA dhe FNSH për të shpërndarë protestën. Basha ka shpërndarë një deklaratë ku i kërkonte ndihmë Edi Ramës. 3 minuta më vonë policia që qëndronte pranë selisë së PD-së ka ndërhyrë. Turma është larguar jashtë perimetrit të selisë. Është hedhur gjithashtu gaz lotsjellës edhe nga policia, si dhe janë shoqëruar disa protestues. Më pas Sali Berisha dhe mbështetësit e tij u tubuan në bulevardin “Dëshmorët e Kombit”. Tentuan të rikthehen sërish në selinë blu, por janë penguar nga policia, e cila ka përdorur sërish gazin lotsjellës.
Në këto kushte Sali Berisha e mbylli protestën, me premtimin se beteja nuk ka përfunduar këtu. Sigurinë dhe kontrollin e selisë së PD-së e mori Policia e Shtetit. Drejtori i Tiranës, Lorenc Panganika tha se protesta ishte e dhunshme, por nuk bëri komente për personat që hodhën gaz lotsjellës nga brenda selisë. Prokuroria e Tiranës ndërkohë do të hetojë pasi e konsideron “skenë krimi” selinë e PD-së. Mbetet për t’u parë se cfarë qëndrimi do të mbajnë me personat që hodhën gaz lotsjellës nga brenda selisë dhe dhunuan protestuesit. Ngjarja e sotme, me gjithë ekseset, dëshmon ndër të tjera se në fakt Basha dhe Rama janë bashkë kur është fjala për të mbajtur larg pushtetit të tyre, Sali Berishën. ©LAPSI.al
