PSG duhet të mbledhë fonde për të rikuperuar humbjet që nuk janë korrigjuar. Sipas L'Equipe, klubi parizien në merkaton e dimrit duhet të shesë për të bërë të paktën 100 milionë euro për të shmangur nevojën për më shumë kapital. Skuadra mezi ka arkëtuar nëntë milionë euro nga shitjet e verës, pavarësisht 180 të planifikuara nga klubi. Në qershor, drejtori sportiv Leonardo kishte paraqitur një plan të ardhurash dhe shpenzimesh pranë institucionit financiar që kontrollon klubet e futbollit në Francë, në të cilin kishte deklaruar synimin për arritjen e një arkëtimi prej 180 milionësh për të kompensuar humbjet e vitit aktual, të vlerësuara në 200 milionë. Meqenëse PSG fitoi vetëm nëntë milionë në merkaton e verës, për gazetën franceze, parisienët duhet të kthejnë menjëherë 100 milionë në arka në mënyrë që të mos detyrojnë Katar Sports Investments të injektojnë kapital.
Ai që mund të zgjidhë hallet është Kylian Mbappé, i cili mund të negociojë zyrtarisht kontratën e tij të ardhshme me Real Madridin që nga 1 janari. Kontrata me parisienët do të skadojë në qershor 2022 dhe klubi spanjoll është gati të përshpejtojë situatën. Real Madrid duhet të njoftojë parisienët për fillimin e negociatave siç përcaktohet nga neni 18 i Rregullores së FIFA-s dhe Statuti për transferimin e lojtarëve. Një klub që dëshiron të lidhë një kontratë me një lojtar profesionist duhet në fakt t'ia komunikojë qëllimin e tij me shkrim klubit, përpara se të hyjë në negociata me lojtarin. Vetë sportisti ka lirinë të nënshkruajë një kontratë me një klub tjetër nëse kontrata e mëparshme me klubin aktual ka skaduar ose do të përfundojë brenda gjashtë muajve.
