E ardhmja e Cristiano Ronaldos është akoma e paqartë, pavarësisht sigurisë së dhënë nga Juventus se portugezi do të veshë fanellën bardhezi edhe këtë sezon. Mbi CR7 janë fokusuar jo vetëm PSG e Manchester City, por edhe Real Madrid, edhe pse zhurmës së bërë nga transmetimi i El Chiringuitos është shuar nga ndërhyrja e menjëhershme e Carlo Ancelottit. Sipas emisionit spanjoll tekniku i ri i merengues e kërkonte me insistim portugezin te Real Madrid, por nga profili zyrtar vetë Ancelotti ka mohuar gjithcka: "Cristiano është një legjendë e Real Madrid e ka gjithë vlerësimin e respektin tim, por nuk kam menduar kurrë ta rikthej në Madrid".
Ai që zbuloi thashethemet e fundit të merkatos ishte Edu Aguirre, një mik i vjetër i Cristianos i cili tha: "Flasim për të ardhmen e afërt, jo për qershorin e vitit 2022. Ekziston mundësia që gjithçka të ndodhë para 1 shtatorit. Ka telefonata të vazhdueshme dhe mendoj se është një marrëveshje e mundshme. Carlo Ancelotti dëshiron të marrë Cristiano Ronaldon përsëri në Madrid, është e gjitha e vërtetë. Ai këmbëngul në një kthim të bujshëm të Ronaldos te Real. Marrëdhënia mes të dyve është shumë e mirë".
Nëse për momentin pista spanjolle është rrëzuar, mbeten aktive ato që e cojnë në Ligue 1 e Premier League. Gjithësesi, më e vështirë duket mbërritja e CR7 te City i Guardiolas, ndërsa PSG nuk lëviz pa qartësuar cështjen Mbappe. Kështu, destinacioni i ardhshëm i CR7 nuk është akoma i sigurtë, por shumë të dhëna e japin larg Torinos.
