Probleme me drejtësinë për Stephan El Shaarawy. Siç raportohet nga 'La Stampa', sulmuesi i Romës ka përfunduar nën hetim për një rrahje të pretenduar kundër një personi që po i vidhte makinën dhe i cili, më pas, e raportoi atë për lëndime. "Bëhet fjalë për një akt që lidhet me regjistrimin e kallëzimit të krimit: klienti im do të dëgjohet nga gjyqtari dhe do të japë versionin e tij të fakteve. Jam i bindur që gjithçka do të zgjidhet në mënyrën më të mirë" ka thënë avokati i sulmuesit italian.
Episodi i referuar daton në 12 shkurtin e kaluar kur El Shaarawy ishte në shtëpinë e lojtarit të Arezzos Alessio Cerci. Ishte pasdite dhe pasi luajtën Playstation ai po shikonte nga dritarja. Kështu që skena u shfaq para syve të tij: ngjitur me makinën e tij të parkuar, një Lamborghini e kuqe flakë, ishte një burrë që, pasi theu një dritare, po përpiqej ta vidhte. Sulmuesi i verdhekuqve doli me vrap nga vila, e ndoqi, e kapi dhe thirri menjëherë forcat e rendit.
"Ai që e akuzon është një person që po i vidhte makinën, ai mund të thotë gjithçka, por duhet të konstatohet. Dhe Stephan do të tregojë se çfarë ndodhi kur të caktohet marrja në pyetje, e cila sigurisht do të zhvillohet në fund të korrikut" shtoi avokati i tij. Hajduti 35-vjeçar me precedentë të shumëfishtë, pasi u dënua në maj me një vit e 4 muaj, paraqiti një ankesë kundër Faraonit për dëmtime fizike. Bashkë me një raport mjekësor për thyerjen e një brinje dhe një këmbe, me një prognozë 60-ditore.
