Nëntë të arrestuar dhe dy policë të plagosur është bilanci i festimeve pas fitores së Anglisë kundër Ukrainës dhe kualifikimit në gjysmëfinalet e Euro 2020, siç konfirmohet nga burimet e policisë. Tre persona u arrestuan me dyshimin e sulmit ndaj një polici, katër me dyshimin e trazirave të dhunshme, një me dyshimin e lëndimit personal dhe një me dyshimin e dehjes dhe sjelljes së trazuar. Në Romë, dy tifozë u raportuan për dokumente të rreme dhe 50 të tjerë u refuzuan në pikën e kontrollit në Olimpico.
Janë 52 tifozë të cilët, pas kontrolleve të kryera nga policia në listat e mbërritjes dhe të biletave, rezultuan të dyshimtë sepse ishin jashtë kohës së duhur për karantinë, në funksion të ndeshjes së djeshme midis Ukrainës dhe Anglisë. Pasi arritën në hotel dhe iu kërkua të mos shkonin në stadium, dy anglezë kanë provuar t'i shmangeshin kontrolleve duke thënë se ata kishin mbërritur në kryeqytet disa ditë më parë me makinë. Të dy u paditën për pretendime të rreme. Sipas asaj që mësohet, 50 mbështetës të tjerë u refuzuan në pesë pikat e kontrollit të ngritura rreth Olimpicos për mungesë të kushteve të kërkuara për legjislacionin anti-Covid.
Tre tifozë kanë marrë një përjashtim 5-vjeçar dhe bëhet fjalë për dy ukrainas dhe një gjerman. Në veçanti, njëri u përpoq të kalonte barrierat e ndarjes mes stendave, ndërsa dy të tjerët gjithashtu u denoncuan për rezistencë ndaj një zyrtari publik. Rreth pesëdhjetë mbështetës britanikë anashkaluan kontrollet e sigurisë në përpjekje për të parë ndeshjen: tifozët fluturuan nga Londra për në Nisë, pasi Franca nuk i ka vendosur kufizime britanikëve dhe më pas morën me qira një makinë me një targë transalpine me të cilën ata arritën në Romë pas një ndalese të shkurtër në Firence.
