Zyrtare/ Lewis Hamilton rinovon me Mercedes: “Për të fituar akoma më shumë”

Është zyrtare, Lewis Hamilton ka rinovuar kontratën e tij me Mercedes dhe do të garojë në 2021 sezonin e nëntë me skuderinë e Stuttgart, i 15 në F1 në karrierën e tij. Mercedes e ka bërë lajmin publik përmes një komunikate. "Jam i ngazëllyer për idenë e garimit akoma me Mercedes - tha kampioni i botës - ne kemi arritur rezultate të jashtëzakonshme së bashku dhe mezi presim të bëjmë edhe më mirë." Kështu, telenovela për rinovimin që nuk po bëhej kurrë ka mbaruar, edhe pse palët javët e fundit kishin specifikuar se ishte thjesht çështje e rregullimit të detajeve. Rinovimi është zyrtarizuar për sezonin 2021 e nuk ka asnjë referencë për sezonin 2022. Marrëveshja, një pikë që Hamilton e kërkonte me ngulm, parashikon një angazhim të ri nga Mercedes për diversitetin dhe përfshirjen, në vazhdën e asaj që u pa vitin e kaluar me pjesëmarrjen e kampionit në fushata sociale të tilla si Black Lives Matter. Por kjo nuk është e gjitha: në njoftimin për shtyp flitet për lindjen e një fondacioni të përbashkët bamirësie, i cili do të ketë misionin e mbështetjes së diversitetit më të madh dhe përfshirjes në të gjitha format e tij në motorsport.

✍️ #AnnounceLewis pic.twitter.com/EFoDLGLDIl

— Mercedes-AMG PETRONAS F1 Team (@MercedesAMGF1) February 8, 2021

"Duam të vazhdojmë me këto rezultate të jashtëzakonshme - ka thënë Hamilton - brenda dhe jashtë piste, duke u përmirësuar edhe më shumë. Jam i vendosur të vazhdoj këtë rrugë që kemi filluar, për ta bërë motorsportin ndryshe për brezat e ardhshëm dhe e falënderoj Mercedesin që është jashtëzakonisht bashkëpunues dhe mbështetës në arritjen e këtij qëllimi. Jam i nderuar të njoftoj fillimin e këtij fondacioni kushtuar diversitetit dhe përfshirjes. Ndihem i frymëzuar nga gjithçka që mund të ndërtojmë së bashku. Dhe padyshim që mezi po pres të zbres në pistë në mars”.