Detaje të reja janë mësuar për ngjarjen tragjike të mbrëmjes së sotme në spitalin “Shefqet Ndroqi”, ku nje 65-vjeçar ndërroi jetë pasi u vetëhodh nga kati i katërt i ndërtesës ku ishte shtruar. Mësohet se policia ka marrë në pyetje disa familjarë dhe mjekë, që kanë ndjekur rastin e 65-vjeçarit nga Klosi, Hasan Miri.
Mësohet se mjekët, kanë deklaruar pranë grupit hetimor se i moshuari ka shfaqur gjatë ditës sjellje jo të qëndrueshme dhe të rënduar psikologjike. Pas konfirmimit me Covid-19, mjekët i kanë rekomanduar 65-vjeçarit të qëndrojë i izoluar në shtëpi, por ditën e djeshme gjendja e tij shëndetësore është përkeqësuar.
Për këtë shkak ai u transportua në “Covid 2” për trajtim më të specializuar mjekësor. Nga deklarimet e mjekëve të turnit dhe atyre që kanë ndjekur rastin e 65-vjeçarit, mësohet se në momentin kur ai ka kryer aktin ekstrem, ka qenë i vetëm në dhomën ku ishte shtruar, e cila kishte vetëm dritare.
Jashtë kamerave, mbesa e viktimës i tha abcnews se 65-vjeçari, edhe më herët ka vuajtur nga depresioni dhe është kuruar. Lajmi se ishte prekur nga koronavirusi, ka rënduar më tepër gjendjen psikologjike të tij. I moshuari ishte vjehrri i deputetit Gjetan Gjetani i cili u shpreh se ditën e fundit ai kishte shfaqur gjendje të rënduar psikologjike.
Ngjarja e rëndë e mbrëmjes së sotme, pason atë të 13 gushtit, ku një i ri në gjendje të rënduar psikologjike, u hodh nga ky spital dhe fatkeqësisht ndërroi jetë. Mjekët thonë se rastet e vetëflijimeve vijnë edhe për shkak të halucinacioneve që krijon truri për shkak të mosushqimit të mjaftueshëm me oksigjen. ©LAPSI.al
