Prokurorët e SPAK, me në krye drejtuesin Arben Kraja, kanë zhvilluar takim me drejtoren e re të BKH, Aida Hajnaj. Ditën e sotme është bërë prezantimi i saj edhe në prani të përfaqësuesve të Ambasadës së SHBA në Tiranë.
Fillimisht numri një i BKH-së duhet të hartojë një rregullore të brendshme të institucionit, që do të përfundojë brenda kësaj jave, ndërsa javën e ardhshme do të hapet gara për 60 vende vakante për oficerë, të cilët duan të bëhen pjesë e strukturës. Të gjithë kandidatët do të duhet të kalojnë një verifikim të imtësishëm, i cili përfshin pasurinë, pastërtinë e figurës dhe aftësitë profesionale.
Verifikimi do të kryhet nga një komision i cili në përbërje ka dy prokurorë të SPAK dhe një gjyqtar të Gjykatës së Posaçme. Më pas kandidatët që do të shpallen fitues do të trajnohen në Shtetet e Bashkuara të Amerikës duke marrë përvojë nga FBI-ja.
Për këtë zhvillim reagoi edhe ambasada amerikane, e cila e konsideroi një gur të rëndësishme në sistemin e drejtësisë shqiptare. BKH është Policia Gjyqësore e Prokurorisë së Posaçme dhe kryen të gjitha veprimet e hetimore. Sipas ligjit kjo strukturë mund të hetojë edhe prokurorët e SPAK nëse ata gjenden në shkelje të ligjit.
Pjesë e byrosë mund të bëhen të gjithë ata oficerë të Policisë Gjyqësorë të cilët punojnë në prokurori, por edhe oficerë të policisë që kanë mbaruar Akademinë e Policisë dhe ka mbi një vit përvojë punë. Nëse të gjitha afatet në ngritjen e BKH respektohen ndoshta struktura do të jetë gati në fund të këtij viti.
