Mbrëmje spektakolare në Nations League, me 27 gola të shënuar në tetë ndeshje, 7 nga të cilat i shënoi vetëm Anglia. Tre luanët ishin të pandalshëm nga Kroacia, e shkatërruar plotësisht. Përgjigjet Spanja, që thyen 3-1 Çekinë, e udhëhequr nga Yamal, autor i një goli që bëri teknikun De La Fuente të vinte duart në kokë.
SPANJË-REP. ÇEKE 3-1
Spanja, e ndryshuar sidomos në mbrojtje dhe në sulm, arrin të fitojë edhe në Oviedo kundër Çekisë. De La Fuente zgjedh Raya në portë në vend të Unai Simon dhe lë pushim gjithashtu Cubarsi, Cucurella, Pubill dhe Oyarzabal. Ai që nuk mund të mungojë kurrë është sigurisht Lamine Yamal, të cilit i duhen vetëm 6 minuta për të gjetur golin e katërt në tri ndeshjet e fundit me kombëtaren. Fenomeni i Barcelonës merr topin nga Dani Olmo dhe nga kufiri i zonës lëshon një goditje perfekte me të majtën, me hark, që përfundon menjëherë poshtë traversës. Në minutën e 35' mendon Rodri për t’u dhënë të tijve avantazhin e dyfishtë: Topi i Artë i vitit 2024 pason te Olmo, i cili e dërgon në qendër, dhe topi i kthehet sërish në këmbë pas një devijimi të pafat të një mbrojtësi çek. Në atë pikë, për të ishte lojë fëmijësh ta dërgonte topin në rrjetë dhe të bënte 2-0.
Në pjesën e dytë, trajneri i La Roja u jep hapësirë edhe Yeremy Pino dhe Munoz, por Spanja relaksohet dhe në minutën e 69' Çekia ngushton diferencën me Slaman, i cili mposht portierin Raya me një goditje të bukur të ulët me të majtën në shtyllën e dytë, pas asistit të Hlozekut. Skuadra e De La Fuentes rikthehet të kontrollojë lojën dhe, pasi mbetet me epërsi numerike pas përjashtimit të Krejci, mbyll ndeshjen në minutën e 89' me Mikel Merino, i cili tregohet i aftë ta shtyjë topin në rrjetë pas pritjes së Kinsky ndaj goditjes së Munozit. Kështu përfundon 3-1 në Oviedo, me kampionët në fuqi të botës dhe Evropës që marrin fitoren e tretë radhazi edhe në Nations League dhe i përgjigjen fitores së madhe të Anglisë, e cila në orën 18:00 kishte mundur 7-0 Kroacinë në Rijeka.
KROACI-ANGLI 0-7
Anglia shkatërron Modric dhe shokët e tij në një ndeshje të dominuar nga fillimi deri në fund dhe ngjitet në kuotën e 6 pikëve në Grupin 3 të Ligës A të UEFA Nations League. Për t’i dhënë avantazhin skuadrës së Tuchel, e cila kishte rrezikuar që në fillim me Gordonin, nuk mund të ishte askush tjetër veçse Harry Kane: sulmuesi i Bayern Munich merr topin nga Bellingham dhe në minutën e 8-të shënon 1-0. Anglezët vazhdojnë të krijojnë raste dhe në minutën e 21' vjen edhe dyfishimi i avantazhit, këtë herë me mesfushorin e Real Madrid, i cili mposht Livakovic me një prekje në zgjatje pas një pasimi të Gordon, i ardhur pas një kontrolli të shkëlqyer në ajër. Anësori, ish-lojtar i Newcastle, pas asistit gjen edhe golin e tij, në minutën e 39', me kokë pas krosimit të Quansah. Kroacia përpiqet të reagojë, por në kundërsulm skuadra e Tuchel është vrastare: Bellingham merr sërish topin nga Gordon, e dërgon në qendër dhe gjen Saka, i cili, krejt i vetëm, duhet vetëm ta shtyjë topin në rrjetë. Në minutën e 45' rezultati është tashmë 4-0.
Bilic përpiqet t’i zgjojë të tijtë me tri zëvendësime në minutën e 45', por muzika nuk ndryshon. Në minutën e 53' vjen dygolëshi i Harry Kane, i cili në rrëshqitje mposht Livakovic pas asistit të Anderson. Askush më parë në histori nuk kishte arritur të shënonte pesë gola kundër Kroacisë në transfertë. Por nuk mbaron këtu, sepse në minutën e 68' edhe Bukayo Saka gjen golin e dytë të mbrëmjes, këtë herë duke përfituar nga një gabim i Stanisic, ashtu si të gjithë shokët e tij, krejtësisht jashtë ndeshjes. Tuchel aktivizon edhe Rogers, i cili në minutën e 87' vulos rezultatin përfundimtar 7-0: mesfushori ofensiv i Chelsea, i nisur në hapësirë, kalon Livakovic dhe shënon në portën e boshatisur. Fitore dërrmuese për skuadrën e Tuchel, që ngjitet në kuotën e 6 pikëve në grup; goditje e rëndë ndërkohë për Kroacinë, e cila, në një stadium me dyer të mbyllura (hyrja ishte lejuar vetëm për 5.000 fëmijë), pëson një humbje historike.
UEFA Nations League
League A: Group 3
Croatia 0-7 England
Spain 3-1 Czechia
League B: Group 1
North Macedonia 0-2 Scotland
Switzerland 2-1 Slovenia
League C: Group 1
Finland 2-1 Albania
Belarus 4-0 San Marino
League C: Group 4
Estonia 1-0 Luxembourg
Iceland 3-0 Bulgaria
