Për pak sa nuk ka përfunduar në goditje fizike tensioni mes deputetit socialist Erion Braçe dhe banorëve të Memaliajt, të cilët protestonin pranë Kuvendit kundër bashkimit të bashkisë së tyre me Tepelenën.
Incidenti ndodhi teksa Braçe iu afrua protestuesve që e lagën me ujë, ndërsa deputeti iu drejtua njërit prej tyre me fjalët "O legen...". Fill pas kësaj dhjetëra banorë që protestonin u acaruan dhe nisën ta quajnë deputetin "Hajdut" dhe "Plehrë". U desh ndërhyrja e deputetit të PD, Tritan Shehu për të qetësuar situatën.
Qytetarët kundërshtojnë ndryshimet e parashikuara në Reformën Administrativo-Territoriale dhe protesta e tyre zhvillohej ndërsa në Komisionin e Ligjeve po diskutohej pikërisht rishikimi i hartës së re territoriale që e shkrin bashkinë e Memaliajt dhe e bashkon atë me Tepelenën.
