Partia Demokratike e Kosovës ka shprehur gatishmëri për të gjetur një marrëveshje me Vetëvendosjen për zgjedhjen e presidentit të ri dhe zhbllokimin e situatës politike.
Pas një takimi gati treorësh me Albin Kurtin, kreu i PDK-së, Bedri Hamza, deklaroi se partia e tij është e gatshme të japë votat për presidentin në seancën e radhës, nëse arrihet marrëveshje mes palëve.
“Partia Demokratike e Kosovës është e gatshme që, në të njëjtën ditë, në seancën e radhës, të bisedojmë, të gjejmë zgjidhjen për presidentin dhe t’i japim votat”, tha Hamza. Megjithatë, ai theksoi se kërkesa kryesore e PDK-së mbetet miratimi përfundimtar i ndryshimeve në ligjin për Dhomat e Specializuara.
Takimi Kurti–Hamza u zhvillua pasi qeveria e Kosovës vlerësoi se nuk ka pengesa ligjore për nismën e PDK-së për ndryshimin e ligjit për Dhomat e Specializuara dhe Zyrën e Prokurorit të Specializuar. Afati i fundit për zgjedhjen e presidentit është 6 tetori.
