Protestat që nisën si kundërshtim ndaj projektit turistik në Zvërnec kanë kaluar tashmë kufijtë e një kauze lokale, duke tërhequr vëmendjen e mediave, aktivistëve dhe platformave ndërkombëtare në rrjetet sociale. Gjatë ditëve të fundit janë shpërndarë gjerësisht video nga tubimet në Tiranë dhe nga protestat e organizuara nga diaspora shqiptare në disa vende të botës.
Pamjet tregojnë mijëra qytetarë me flamuj kuqezi dhe pankarta në duar, ndërsa artikulojnë kërkesa që shkojnë përtej kundërshtimit të projektit në Zvërnec.Protestuesit kanë theksuar se lëvizja lidhet edhe me korrupsionin, taksat, keqqeverisjen dhe mungesën e llogaridhënies nga institucionet shtetërore.
Vetë protestuesit kanë sqaruar se lëvizja nuk kufizohet më vetëm te kundërshtimi i projektit në Zvërnec. Aktivistë të pranishëm në tubime janë shprehur se qytetarët po protestojnë kundër korrupsionit, keqqeverisjes dhe mungesës së llogaridhënies. Në shumë prej pankartave dhe videove të shpërndara në rrjet dominon slogani "Free Albania", i cili është kthyer në një nga mesazhet kryesore të mobilizimit.
Jehona ndërkombëtare vjen në një moment kur protestat kanë hyrë në ditën e shtatë dhe po shoqërohen me mbështetje të vazhdueshme nga diaspora shqiptare. Tubime janë zhvilluar edhe në Vjenë, Londër, Berlin, Mynih, Milano, Stokholm dhe Uashington.
