Jennifer Aniston ka reaguar ndaj humbjes së mikut të saj të vjetër dhe regjisorit të serialit Friends, James Burrows, i cili ndërroi jetë në moshën 85-vjeçare.
Aktorja e serialit The Morning Show, 57 vjeç, publikoi të shtunën një homazh të gjatë në Instagram, një ditë pas vdekjes së Burrows më 20 qershor.
“Oh boy… Papa Burrows,” shkroi Aniston. “Gjëja më e vështirë kur shkruan për ty është se ti ke kaluar një jetë duke i bërë njerëzit të ndihen të dashur, dhe tani duket e pamundur ta përmbledhësh gjithë atë dashuri në disa paragrafë.”
Aniston e përshkroi Burrows si një figurë atërore për të dhe për kastin e “Friends”, duke treguar se ai shpesh i quante aktorët “fëmijët e mi” dhe bënte shaka gjatë xhirimeve duke thënë: “Ku janë fëmijët?” apo “Le të shohim nëse fëmijët e bëjnë shakanë të funksionojë”.
Ajo shtoi se ai ishte gjithmonë i pranishëm në jetën e saj, duke e mbështetur, këshilluar dhe motivuar në çdo periudhë.
“Na mësoi, neve fëmijëve, sa e rëndësishme është të duam dhe të respektojmë njëri-tjetrin. Të kujdesemi për njëri-tjetrin dhe të jemi gjithmonë pranë njëri-tjetrit,” shkroi Aniston.
Aktorja e përfundoi mesazhin duke shprehur mungesën e thellë për të: “Më mungon zëri yt, më mungon e qeshura jote, më mungon gjenialiteti yt.”
Së bashku me homazhin, ajo ndau edhe foto nga vite të ndryshme me Burrows, përfshirë një përqafim mes tyre në një event, si dhe një foto ikonike të kastit të “Friends” gjatë një fluturimi për në Las Vegas në vitin 1994, pak para premierës së serialit.
Homazhe për Burrows kanë bërë edhe kolegët e tij nga seriali, përfshirë David Schwimmer, Lisa Kudrow dhe Matt LeBlanc, të cilët e përshkruan atë si një figurë të jashtëzakonshme dhe “si një baba” për kastin.
Sipas tyre, Burrows kishte aftësinë të nxirrte më të mirën nga aktorët dhe të krijonte një atmosferë familjare në çdo projekt ku punonte.
