Pas muajsh spekulimesh, Tom Holland ka konfirmuar më në fund se është martuar në fshehtësi me partneren e tij prej vitesh dhe kolegen në filmat “Spider-Man”, Zendaya.
Çifti, i cili u njoh në vitin 2016 gjatë xhirimeve të filmit të parë të “Spider-Man”, është ndër më diskretët në Hollivud dhe ka mbajtur gjithmonë jetën private larg vëmendjes së publikut.
Konfirmimi erdhi gjatë një interviste për Esquire, ku aktori foli për fotografitë virale të krijuara me inteligjencë artificiale, që tregonin sikur ai dhe Zendaya po festonin martesën në Liqenin e Como-s.
Kur u pyet nëse u detyrua t’u shpjegonte familjarëve situatën, Holland u përgjigj shkurt: “Jo, sepse ata ishin të gjithë aty. Kaq do të them.” Me këtë deklaratë, ai duket se konfirmoi se martesa kishte ndodhur tashmë.
Dyshimet për fejesën nisën në janar të vitit 2025, kur Zendaya u shfaq në ceremoninë e “Golden Globes” me një unazë diamanti në gisht. Më pas, në mars të këtij viti, stilisti i saj prej kohësh, Law Roach, habiti fansat kur deklaroi se “dasma ka ndodhur tashmë.”
Ndërkohë, Tom ka folur edhe më herët për planet e tij familjare. Në një intervistë për Men’s Health, ai tregoi se, kur të bëhet baba, synon të tërhiqet nga aktrimi.
“Kur të kem fëmijë, nuk do të më shihni më në filma. Golf dhe të qenit baba. Do të zhdukem nga vëmendja e publikut,” u shpreh ai.
Pas konfirmimit të martesës, çifti u rikthye edhe në tapetin e kuq për promovimin e filmit “Spider-Man: Brand New Day”, duke bërë paraqitjen e tyre të parë të përbashkët pas gati pesë vitesh.
