Olivia Wilde ka thyer më në fund heshtjen për lidhjen e saj me këngëtarin Harry Styles, duke pranuar se romanca e tyre shkaktoi reagime të forta në publik.
Gjatë një interviste në podcastin “Call Her Daddy”, aktorja dhe regjisorja 42-vjeçare e përshkroi marrëdhënien me Styles si një nga periudhat më të bukura të jetës së saj.
“Zemëroi vërtet shumë njerëz. Ata ishin jashtëzakonisht të irrituar. Ne kishim një marrëdhënie shumë të bukur, të ëmbël dhe të qetë. Jetonim në një flluskë tonën dhe gjykimet e botës së jashtme nuk arritën të depërtonin aty,” tha Wilde.
Ajo shtoi se, ndonëse jashtë kishte një “stuhi mediatike”, jeta e tyre private ishte krejt ndryshe.
“Kisha gjetur gëzim, dashuri dhe lumturi. Ishte sikur tornado të ishte jashtë derës, por brenda gjithçka ishte e qetë,” u shpreh aktorja.
Olivia dhe Harry nisën lidhjen në fund të vitit 2020, pasi u njohën gjatë xhirimeve të filmit “Don’t Worry Darling”, të cilin Wilde e drejtoi. Çifti u nda në mënyrë miqësore në nëntor të vitit 2022, pas gati dy vitesh së bashku.
Aktorja foli edhe për presionin e madh që, sipas saj, Harry Styles përjeton për shkak të famës së jashtëzakonshme dhe marrëdhënies së fortë që fansat krijojnë me idhujt e tyre.
“Është një barrë e pamundur. Ai e përballon me shumë hijeshi, por nuk është diçka që do ta kisha zili,” tha ajo, duke shtuar se disa fansa dukeshin të zemëruar thjesht sepse e shihnin atë të lumtur pranë këngëtarit.
Në intervistë, Wilde foli edhe për jetën personale pas ndarjes nga aktori Jason Sudeikis, me të cilin ka dy fëmijë. Ajo tha se ka bërë shumë terapi dhe beson se ndarja ishte vendimi i duhur për familjen e tyre.
Ndërkohë, Harry Styles thuhet se është i fejuar me aktoren Zoe Kravitz, ndërsa Olivia Wilde është parë së fundmi në shoqërinë e Caspar Jopling.
