Kreu i Partisë Demokratike, Sali Berisha e cilësoi Parlamentin si një institucion të Ergys Agasit, biznesmenit të akuzuar nga SPAK si kreu i grupit kriminal në AKSHI, bashkë me personat e tjerë të marrë të pandehur.
“Kjo seancë do të hyjë në histori si seanca më e turpshme ndonjëherë. Sot parlamenti mblidhet si parlamenti i Ergys Agasit, si parlamenti më i papërgjegjshëm në tërë historinë kombëtare të ndonjë vendi. Sot, për çdo shqiptar, që i thotë vendit vend, sigurisë siguri, çështje të gjitha çështjeve është shembja totale e sigurisë së vendit pasi kryetarja e SHISH rezulton një anëtare e poshtër e grupit të strukturuar kriminal Agasi.
Në këtë sallë kam deklaruar, paralajmëruar se Agasi është mafiozi më i rrezikshëm i Evropës. Po, sepse ai kontrollonte si asnjë tjetër në Shqipëri dhe Evropë të gjitha kartelet e drogës, të gjithë internetin e territorit të vendit. Të gjitha sekretet e shtetit dhe SHISH. Ai kishte fuqi të pakufizuar dhe këtë fuqi e kishte nga padrino i vendit. Rasti i Hysenit është i treti në botë.”, tha Berisha.
