Botërori 2026 po merr gjithnjë e më shumë tiparet e spektaklit amerikan, një shfaqje që po e afron futbollin me sportet amerikane. Fillimisht erdhën ndërprerjet gjatë kohës së rregullt të ndeshjes, duke krijuar hapësira për sponsorët dhe televizionet, më pas “halftime show” i finales, që do ta zgjasë pushimin nga 15 në 30 minuta për t’i dhënë mundësi zhvillimit të spektaklit gjigant. Tani vjen risia më e fundit, absolutisht në stilin amerikan: të gjithë futbollistët e kombëtares që do të shpallet kampione e botës mes Spanjës dhe Argjentinës, përveç medaljes tradicionale të artë, do të marrin edhe një unazë të personalizuar dhe të numeruar, ashtu siç ndodh prej vitesh me fituesit e titullit në NBA.
Nëse do të jetë vetë presidenti Donald Trump ai që do t’ua vendosë në gisht fituesve këto unaza të veçanta, kjo do të mësohet vetëm gjatë ceremonisë. Për momentin është konfirmuar prania e presidentit amerikan në stadiumin SoFi. Deri tani ai nuk ka ndjekur asnjë ndeshje nga afër dhe ka gjasa të ndodhë e njëjta gjë si në Botërorin e Klubeve, kur Trump theu çdo protokoll zyrtar, duke qëndruar në podium jo vetëm gjatë ceremonisë së ndarjes së trofeut, por edhe duke u futur në fotot festive të Chelseat. Sido që të jetë, edhe finalja e Botërorit 2026 do të përjetojë “ëndrrën amerikane” deri edhe pas vërshëllimës së fundit, duke u dhuruar kampionëve një unazë në stilin e NBA-së.
? ? LOS CAMPEONES DEL MUNDO RECIBIRÁN ANILLOS DE CAMPEÓN
— Carrusel Deportivo (@carrusel) July 16, 2026
La FIFA anuncia esta medida en lo que es un guiño al deporte americano
? Se confeccionarán únicamente 2026 ejemplares, de los cuales 30 se otorgarán a los ganadores y el resto, se pondrán a la venta para aficionados. pic.twitter.com/PEnBj85omV
Unazat e kampionëve të botës: të veçanta dhe për koleksion
Çdo unazë do të jetë e numeruar, e prodhuar sipas përmasave të secilit fitues dhe do të shoqërohet me një certifikatë autenticiteti. E gjithë kjo do të dorëzohet menjëherë pas përfundimit të finales së 19 korrikut mes Argjentinës dhe Spanjës. Sipas informacioneve të para, do të prodhohen gjithsej 2.026 unaza të numeruara individualisht. Prej tyre, 30 do t’u jepen kampionëve të botës, ndërsa 1.996 të tjerat do të dalin në shitje si produkte zyrtare të licencuara, duke u dhënë tifozëve mundësinë të zotërojnë një pjesë unike të kujtimeve të Botërorit FIFA 2026.
Kur do t’u dorëzohen lojtarëve: si parashikohet ceremonia
Informacionet e para janë kontradiktore. Ka nga ata që thonë se fillimisht do të dorëzohen vetëm dy unaza, një për kapitenin dhe një për trajnerin, si simbol i triumfit, ndërsa unazat zyrtare do të prodhohen dhe personalizohen më pas. Megjithatë, zëra të rinj thonë se gjithçka do të ndodhë menjëherë pas finales: lojtarët kampionë dhe trajneri do të kalojnë para autoriteteve për ceremoninë tradicionale të përshëndetjes, do të marrin medaljet, më pas do të ngrenë Kupën e Botës dhe në fund do t’u vendosen në gisht unazat, në mënyrë që t’i mbajnë para kamerave dhe fotografëve.
