“Jam rritur pak dhe edhe Leo gjithashtu. Shpresoj të përballem me Lionel Messin në finale, pasi nuk ia dolëm në Finalissima.” Me këto fjalë, të thëna në një intervistë të fundit për DAZN, Lamine Yamal komentoi fotografinë që prej vitesh vazhdon të emocionojë botën e futbollit: ai, ende foshnjë, në krahët e argjentinasit Lionel Messi. Ajo që atëherë ishte vetëm një set fotografik bamirësie i organizuar nga Barcelona për një kalendar të UNICEF-it, me kalimin e viteve u shndërrua në një nga imazhet më ikonike në historinë e futbollit.
Në vitin 2007 Messi ishte vetëm 20 vjeç, konsiderohej tashmë talenti që do të trashëgonte yjet e mëdhenj të Barcelonës, por ishte ende larg legjendës që njohim sot. Përballë tij ishte një foshnjë vetëm tetë muajshe, Lamine Yamal, i destinuar të bëhej një nga talentet më të mëdhenj të brezit të tij.
Historia pas fotos ku Messi i bën banjë Yamal në vitin 2007
Historia nisi thuajse rastësisht. Familja e Lamine Yamal, që jetonte në Mataró, fitoi një lotari të organizuar nga UNICEF, e cila u jepte disa familjeve mundësinë të merrnin pjesë në setin fotografik me futbollistët e Barcelonës. Nëna e kampionit të ardhshëm, Sheila Ebana, me origjinë nga Guinea Ekuatoriale, dhe babai, Mounir Nasraoui, maroken, e çuan Lamine-n e vogël në “Camp Nou”, pa e imagjinuar se ai moment do të hynte në histori.
Fotografi Joan Monfort, autor i fotos, kujtoi për “Associated Press”: “Ai po dilte nga dhomat e zhveshjes dhe papritur u gjend në një tjetër dhomë zhveshjeje me një legen plastik plot me ujë dhe një foshnjë brenda.” Messi, i cili në atë kohë nuk ishte ende baba, u gjend në një situatë krejtësisht të re. “Ishte e vështirë. Në fillim nuk dinte as si ta mbante në krahë. Ishte jashtëzakonisht e vështirë”, kujtoi Monfort, duke nënvizuar natyrën e turpshme të yllit argjentinas.
Vetë fotografi kishte treguar më parë për agjencinë EFE: “Nuk ekziston asnjë shumë parash që mund ta blejë një fotografi si kjo.” Edhe zgjedhja e Lamine ishte fryt i fatit. “Ishte rastësia që i bëri bashkë. Fotoja mund të ishte bërë me një futbollist tjetër, por u realizua me Leon. Me siguri, nëse familja do të kishte pasur mundësi të zgjidhte, do të kishte preferuar Ronaldinhon, Xavin ose Iniestën”, shpjegoi Monfort.
Fotografi kujtoi edhe përgatitjen e setit: “Sfondi ngjyrë bordo, ndriçimi për të ndriçuar ambientin. Doja ta kisha skenën nën kontroll. Pastaj shfaqet Messi dhe takon një foshnjë. Messi ishte 20 vjeç, fëmija vetëm 8 muajsh. Ishte me shumë gjasa foshnja e parë që Leo mbante ndonjëherë në krahë dhe, natyrisht, ndërveprimi mes tyre ishte i vështirë.”
Fotografi Monfort: “Në fillim nuk dinte as si ta mbante në krahë”
Për vite me radhë ato fotografi mbetën pothuajse të panjohura. Gjithçka ndryshoi në verën e vitit 2024, kur babai i Yamal i publikoi në Instagram, ndërsa djali i tij po pushtonte Europën me fanellën e Spanjës.
Përshkrimi “fillimi i dy legjendave” u bë viral dhe e shndërroi fotografinë në simbol të kalimit të stafetës mes dy brezave. Monfort pranoi se deri atëherë nuk e kishte kuptuar se kush ishte bërë ai foshnjë. “Është vërtet emocionuese të jem i lidhur me diçka që ka bërë kaq shumë bujë. Të them të drejtën, është një ndjesi shumë e bukur.”
Sot ajo fotografi merr një vlerë edhe më të jashtëzakonshme. Dy protagonistët e saj do të përballen me njëri-tjetrin në finalen e Botërorit 2026: nga njëra anë Lionel Messi, ende lider i Argjentinës dhe i vendosur ta pasurojë më tej një karrierë të papërsëritshme; nga ana tjetër Lamine Yamal, talenti që shumë e konsiderojnë tashmë të ardhmen e futbollit botëror dhe që ëndërron të fitojë titullin e tij të parë botëror pikërisht kundër kampionit që e mbante në krahë kur ishte vetëm tetë muajsh.
Një rastësi që duket sikur ka dalë nga një film, por që fati e ka kthyer në realitet: fillimisht një fotografi ikonike, tani 90 minuta që mund të vulosin përfundimisht kalimin e stafetës mes dy epokave të futbollit.
