Në mbledhjen e sotme të Këshillit të Sigurisë Kombëtare ra në sy mungesa e Drejtorit të Përgjithshëm të Policisë së Shtetit, Skënder Hita, një fakt që ushqen edhe më tej pikëpyetjet për marrëdhëniet mes Ramës dhe drejtuesve të lartë të policisë pas arrestimit të Ergys Agasit.
Spekulimet u shtuan edhe pas largimit nga detyra të ministrit të Brendshëm, Besfort Lamallari, ndërsa nga opozita pretendohet se kryeministri është i pakënaqur me mënyrën se si strukturat e policisë vepruan në arrestimin e Ergys Agasit dhe se nuk përjashtohen lëvizje të tjera në nivelet drejtuese.
Por mungesa e Drejtorit të Përgjithshëm të Policisë në mbledhjen e Këshillit të Sigurisë duket se ka një shpjegim tjetër, të paktën sipas një burimi jozyrtar pranë Policisë së Shtetit.
Burimi tha se drejtori ndodhet aktualisht në Hagë, në Holandë, në kuadër të një vizite të planifikuar më herët dhe po zhvillon takime me drejtues të strukturave policore të vendeve të Bashkimit Europian.
Në qendër të këtyre takimeve, ku është edhe zëvëndësdrejtori Sokol Bizhga sipas të njëjtit burim, janë platformat e bashkëpunimit, shkëmbimi i informacionit dhe koordinimi mes strukturave europiane në luftën kundër krimit të organizuar.
Policia e Shtetit, megjithatë, deri tani nuk ka bërë publik një njoftim zyrtar për vizitën dhe axhendën e Drejtorit të Përgjithshëm në Hagë, por kjo pritet të ndodhë në ditët në vazhdim.
Vizita e Skënder Hitës jashtë vendit shpjegon mungesën në mbledhjen e Këshillit të Sigurisë, gjithsesi mbetet për t’u parë në ditët në vijim nëse tensioni i përfolur do të mbetet në nivelin e zërave politikë apo Rama do të urdhërojë lëvizje konkrete në kupolën drejtuese të Policisë së Shtetit.
