Katy Perry do të jetë një nga emrat kryesorë të Sunny Hill Festival këtë verë, duke shtuar edhe Kosovën në turin e saj nëpër Evropë.
Lajmi u zbulua përmes një videoje të publikuar nga Dua Lipa në Instagram, ku dy këngëtaret zhvillojnë një bisedë telefonike plot entuziazëm. Katy tregoi se po përgatitet intensivisht për sezonin veror.
“Do të jem në të gjithë Evropën, nga qershori deri në fund të gushtit”, tha ajo.
Kur Dua e pyeti nëse do të performonte diku ku mund ta ndiqte nga afër, Katy zbuloi surprizën.
“Në fakt do të jem në një vend që quhet Prishtinë”, tha ajo, duke iu referuar kryeqytetit të Kosovës.
E habitur, Dua e pyeti se çfarë do të bënte atje, ndërsa Katy iu përgjigj me buzëqeshje: “Do performoj në një festival që quhet Sunny Hill Festival!”
“Zot i madh! Po vjen në qytetin tim të lindjes!”, reagoi Dua me entuziazëm.
Katy e falënderoi këngëtaren për ftesën, duke theksuar se mezi pret të takojë fansat e saj në Kosovë.
“Kam shumë fansa që mezi pres t’i takoj. Dhe sigurisht edhe fansat e tu”, u shpreh artistja, përpara se ta pyeste Duan nëse do të ishte e pranishme.
“Do të jem aty, duke kënduar çdo fjalë”, u përgjigj Lipa.
Sunny Hill Festival do të mbahet nga 31 korriku deri më 2 gusht në Prishtinë, ndërsa Katy Perry do të ngjitet në skenë në natën hapëse të festivalit.
Në vitet e kaluara, festivali ka sjellë emra të njohur ndërkombëtarë si Miley Cyrus, Calvin Harris, Bebe Rexha dhe Shawn Mendes.
