Të dehurit përsëritës në timon rrezikojnë të humbasin patentën përgjithmonë. Ndryshimet e reja në Kodin Rrugor ashpërsojnë ndëshkimet edhe për shoferët e rinj, përdorimin e celularit, shpejtësinë dhe manovrat e rrezikshme.
Sipas rregullave të reja, një drejtues që është ndëshkuar më parë për alkool dhe kapet sërish me mbi 0.5 g/l në gjak, humbet përfundimisht lejen e drejtimit. Ai nuk do të ketë më të drejtë ta rimarrë atë përmes autoshkollës.
Masa të forta parashikohen edhe për drejtimin pa patentë. Një i rritur që kapet në timon pa leje drejtimi nuk mund të pajiset me patentë për një vit. Për të miturit, afati shtyhet edhe më shumë. Ata duhet të presin dy vite pasi mbushin 18 vjeç për të nisur procedurat.
Kufizime të reja vendosen edhe për shoferët e rinj. Gjatë dy viteve të para pas marrjes së patentës, ata nuk lejohen të konsumojnë alkool para drejtimit. Shpejtësia maksimale do të jetë 90 km/h në autostradë dhe 80 km/h në rrugët jashtë qendrave të banuara.
Shkelja e këtyre kufizimeve dënohet me gjobë nga 5 mijë deri në 15 mijë lekë, pezullim të patentës për një muaj dhe heqje pikësh. Nëse brenda një viti kryhen dy shkelje, kufizimet mund të zgjaten edhe për një vit tjetër. Ndryshon edhe rregulli për pezullimin e patentës. Për lejet e drejtimit të lëshuara në Shqipëri nuk do të lejohet më zëvendësimi i pezullimit me pagesën e dyfishit të gjobës. Pezullimi do të zbatohet automatikisht.
Rriten gjithashtu gjobat për shpejtësinë në zona të banuara, pranë shkollave, garat me makina dhe manovrat agresive. Gjobat mund të shkojnë nga 20 mijë deri në 60 mijë lekë. Edhe përdorimi i celularit ndëshkohet më fort. Nëse një shofer kapet dy herë brenda një viti me telefon në dorë, patenta i pezullohet për tre muaj. Ndalimi vlen edhe për drejtuesit e biçikletave, motorëve të vegjël dhe monopatinave.
