Shqipëria humbet miqësoren me Izraelin dhe Rolando Maran debuton me humbje në pankinën kuqezi. Vendosi një gol i Gloukh në minutën e 73’ që provokoi një sherr me Hysajn e të tjerët, me gjestin e heshtjes ndaj tifozëve që thërritën “Palestina” në kor. Ndeshja e parë me fanellën e Kombëtares për Luis Hasën, ndërsa pak gjëra të mira u panë në këtë sfidë, me gabime në fazën defensive, të shpëtuara për një pasiv më të rëndë, nga ndërhyrjet e Sherrit.
Ndryshimi i parë i Maran, përveç skemës, ishte Anis Mehmeti që mori vendin e Bajramit, ndërsa të tjerët ishin në vendet e tyre. Hoxha u preferua si sulmues i dytë në mbështetje të Brojës, në pamundësi ëpr të rikuperuar Uzunin me grip, por eksperimenti nuk është se impresionoi. Sulmuesi anësor i Dinamo Zagreb nuk bëri dot asgjë, shpesh i spostuar natyralisht në të majtë. Tjetër ndeshje nën ton e Brojës, i shfaqur vetëm në një inkursion me fushë të hapur. Mehmeti, i freskët nga ngjitja në Premier League, mund të ishte protagonist, por gaboi një finalizim të thjeshtë në zemër të zonës, pas krosimit të Hysajt, në atë që ishte mundësia më e mirë e Shqipërisë.
Asllani nuk mori përsipër, ndërsa gabimet dhe kaosi defensiv që krijonte Solomon ishin në evidencë në pjesën e dytë, ku Sherri u ngjit në katedër, duke u dorëzuar vetëm në minutën e 73’, kur kundërsulmi i Izraelit i dha mundësinë Gloukh të shënonte golin e vetëm të miqësores, që pikërisht në atë moment u kthye në armiqësore. Gjesti me gisht i heshtjes së sulmuesit që tregoi stemën e Izraelit ndaj korit të tifozëve për Palestinën, nervozoi Hysajn që kërkoi konfliktin me autorin e golit, duke përfshirë edhe të tjerët.
Pastaj debutimi i Hasës ishte shumë i vonë për të gjykuar performancën e parë, ndërsa Hadroji rrezikoi ti jepte golin e dytë Izraelit (Sherri shpëtimtar). Pajaziti ndezi mesfushën shumë më tepër se Asllani, ndërsa Shpendi pati fare pak minuta për të bërë atë që bën në fushat e Serie B. Një humbje në miqësoren e parë për Maran, që tani do të ketë tre ditë për të përgatitur të dytën me Luksemburgun.
