Kombëtarja shqiptare e futbollit ka zhvilluar sot pasdite në stadiumin “Air Albania” seancën zyrtare stërvitore, duke finalizuar përgatitjet për ndeshjen miqësore të nesërme kundër Izraelit. Nën drejtimin e trajnerit Rolando Maran, skuadra zbriti në fushë pothuajse e plotë, me përjashtim të sulmuesit Myrto Uzuni. Beratasi po kalon një gjendje gripale dhe gjendja e tij do të vlerësohet sërish nesër nga stafi mjekësor i Kombëtares, duke lënë pjesëmarrjen e tij në ndeshje në pikëpyetje.
Një mungesë që do ta vinte në siklet teknikun Rolando Maran dhe do t'i hapte rrugën Armando Brojës, për ta nisur si titullar kundër Izraelit. Sidoqoftë, me Uzunin shkon në tre numri i të padisponueshëmve, pasi më parë ishin tërhequr edhe Ismajli e Aliji.
Gjatë stërvitjes, kuqezinjtë zhvilluan ushtrime fizike, si dhe skema të ndryshme tekniko-taktike, të cilat pritet të zbatohen në fushë ndaj kundërshtarit. Në kampin e Kombëtares mbizotëron një frymë pozitive dhe motivim i lartë për të arritur një rezultat të kënaqshëm në sfidën e nesërme.
Ndeshja miqësore mes Shqipërisë dhe Izraelit do të luhet nesër, duke nisur nga ora 20:00, sërish në ambientet e stadiumit kombëtar “Air Albania”. Tifozët që dëshirojnë të mbështesin nga afër kuqezinjtë, mund të sigurojnë biletat online në platformën ebileta.al ose pranë pikës fizike të shitjes në stadium.
