Një tjetër ish-punonjëse e shtëpisë së Kylie Jenner ka ngritur padi ndaj yllit të reality show-t, duke e akuzuar pë keqtrajtim në vendin e punës.
Juana Delgado Soto ka paditur 28-vjeçaren, kompaninë Kylie Jenner Inc., mbikëqyrësen e stafit Itzel Sibrian, si dhe Tri Star Services dhe La Maison Family Services, për diskriminim racor, ngacmim, mospagim të pagave, si dhe dështim për të parandaluar apo adresuar abuzimet, sipas dokumenteve gjyqësore të siguruara nga Los Angeles Times.
Sipas padisë, Soto ka nisur punën për Jenner në vitin 2019 dhe pretendon se gjatë gjithë periudhës nuk i janë dhënë pushimet e nevojshme për ushqim apo pushim. Ajo thotë se situata u përkeqësua ndjeshëm në vitin 2023, kur Itzel Sibrian u bë mbikëqyrësja e saj.
Në vitin 2024, Soto raportoi në burimet njerëzore për trajtimin që, sipas saj, ishte abuziv. Ajo akuzon Sibrian se e ka tallur për theksin, statusin e emigracionit dhe racën, madje duke e quajtur “budallaqe”.
Pas ankesës, Sibrian u largua përkohësisht, por më pas u rikthye në detyrë. Sipas padisë, ajo më pas u hakmor ndaj Soto duke i ulur pagën, duke i dhënë ngarkesë të tepruar pune dhe duke i ndryshuar orarin.
Padia përfshin edhe pretendime të tjera, si detyrimi për të munguar në festën surprizë të ditëlindjes për të shërbyer në një darkë të Jenner, si dhe refuzimi për t’i dhënë kohë të mjaftueshme për të vajtuar vdekjen e vëllait të saj. Ajo shton se kolegët dyshonin për vërtetësinë e humbjes së saj dhe e detyronin të pastronte mbeturina që i hidhnin qëllimisht.
Situata arriti kulmin në prill 2025, kur Soto i shkroi një letër të gjatë Jenner-it, duke shprehur shqetësimet e saj për trajtimin nga stafi. Sipas dokumenteve, ajo e vendosi letrën në dhomën e masazhit të Jenner-it.
Në letër, ajo shkruante: “Kam nevojë të shpreh sa keq po abuzohem psikologjikisht” dhe shtonte se besonte që Jenner nuk do ta lejonte një situatë të tillë nëse do të ishte në dijeni.
Një ditë më pas, Soto pretendon se u kërcënua me pushim nga puna. Sipas padisë, asaj iu tha se nuk duhej ta shikonte apo t’i buzëqeshte Jenner-it dhe se duhej “të zhdukej” nëse e shihte.
Pretendimet vazhdojnë me kufizim të aksesit në tualet, detyrim për të pastruar strehën e qenve dhe ndalim për të pirë ujë në shtëpi, i cili thuhet se konsiderohej “uji i Kylie-t”.
Në gusht 2025, Soto dha dorëheqjen përmes një mesazhi, duke shkruar se nuk mund ta përballonte më situatën, duke përmendur ankthin, pagjumësinë dhe trajtimin e vazhdueshëm të keq.
Përfaqësuesit e Jenner nuk kanë komentuar mbi çështjen. Sipas raportimeve, ajo ende nuk e ka parë padinë.
Avokatja Della Shaker përfaqëson Soto në këtë proces dhe gjithashtu po mbron edhe një tjetër ish-punonjëse, Angelica Vazquez, e cila ka ngritur një padi të ngjashme në mes të prillit.
