Deputeti i Partisë Demokratike, Enno Bozdo, ka reaguar pas deklaratave të kryeministrit Edi Rama, i cili tha se në Berat ka nisur kthimi i emigrantëve dhe se trendet demografike janë në përmirësim.
Në një postim në Facebook, Bozdo i cilësoi këto deklarata si “mashtrime”, duke theksuar se realiteti në terren është krejt i kundërt.
“Ju e dini mirë të vërtetën. Në qytete s’ka më rini, familjet po largohen, ndërsa në fshatra mungojnë jo vetëm të rinjtë, por edhe fermerët”, u shpreh ai, duke ia atribuar këtë situatë keqqeverisjes.
Sipas deputetit demokrat, përgjegjës për këtë situatë është vetë kryeministri Rama, për të cilin ai tha se “në 12 vite e ka tretur Beratin dhe gjithë Shqipërinë”, duke detyruar qytetarët të emigrojnë.
Në mbështetje të qëndrimit të tij, Bozdo publikoi edhe të dhëna nga INSTAT, sipas të cilave popullsia e qarkut Berat ka pësuar rënie të vazhdueshme gjatë viteve të fundit.
Sipas këtyre të dhënave, popullsia e qarkut ka rënë nga rreth 143,900 banorë në vitin 2013, në rreth 107,000 banorë në vitin 2024, duke shënuar një tkurrje të ndjeshme nga viti në vit.
Bozdo akuzoi gjithashtu qeverinë për propagandë, duke theksuar se ndërkohë që qytetarët përballen me vështirësi ekonomike dhe largim masiv, qeveria përpiqet të paraqesë një realitet ndryshe.
